Ilçi bilen täsirli okuw sapagy
2021-nji ýylyň 5-nji iýunynda Türkmenistanyň Beýik Britaniýanyň we Demirgazyk Irlandiýanyň Birleşen Patyşalygyndaky ilçisi Ýazmyrat Serýaýew “Ýewropa ýurtlarynyň daşary syýasatynyň we diplomatiýasynyň aýratynlygy” mowzugy boýunça Türkmenistanyň Daşary işler ministrliginiň Halkara gatnaşyklary institutynyň talyplaryna wideoaragatnaşyk arkaly okuw sapagyny geçirdi. Bu okuw sapagy Halkara gatnaşyklary institutynyň talyplarynyň diplomatiýa bilen bagly bilim derejesini has hem kämilleşdirmek maksady bilen, Türkmenistanyň Daşary işler ministrligi tarapyndan gurnalýan toplumlaýyn onlaýn sapaklarynyň nobatdakysy bolup durýar.
Okuw sapagy rus dilinde geçirilip, onuň dowamynda hormatly ilçi Ýewropa diplomatiýasynyň geçmişi, şu güni we geljegi barada giňişleýin, gyzykly wakalaryň mysalynda gürrüň berdi.
Wideoaragatnaşyk ulgamy arkaly geçen okuw sapagynyň dowamynda Türkmenistan bilen Ýewropa döwletleriniň arasynda ählumumy we sebitleýin durnuklylygy we howpsuzlygy üpjün etmeklige esaslanan dostlukly, hyzmatdaşlyk gatnaşyklary hakynda hem gürrüň edildi. Ilçi Türkmenistan bilen Ýewropa döwletleriniň söwda-ykdysady we başga ulgamlarda özara bähbitleriniň bardygyny, Ýewropa ýurtlarynyň birnäçesi bilen döwletara we hökümetara şertnamalaryň hem ylalaşyklaryň baglaşylandygyny, nygtap geçdi.
Sapagyň ahyrynda institutymyzyň talyplary ýurdumyzyň hyzmatdaşlygynyň Ýewropa ugruny ikitaraplaýyn derejede hem, Ýewropa Bileleşiginiň ugry boýunça hem hil taýdan güýçlendirilmeginde ilçimiziň degerli goşant goşjakdygyna ynam bildirýändiklerini aýtdylar.
Baýnazar NEPESOW,
Türkmenistanyň Daşary işleri ministrliginiň
Halkara gatnaşyklary institutynyň
Halkara gatnaşyklary
fakultetiniň I ýyl talyby.