Ilçi bilen geçirilen onlaýn okuw sapagy
2021-nji ýylyň 8-nji iýunynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiniň talyplarynyň diplomatiýa bilen bagly bilim derejelerini has hem kämilleşdirmek maksady bilen, Türkmenistanyň Daşary işler ministrligi tarapyndan gurnalýan toplumlaýyn onlaýn sapaklarynyň nobatdaky okuwy geçirildi. Onda Türkmenistanyň Hindistandaky Adatdan daşary we Doly ygtyýarly ilçisi Şalar Geldinazarow “Türkmenistanyň we Hindistanyň arasynda saglygy goraýyş we derman senagaty ugurlarynda hyzmatdaşlyk” mowzugy boýunça wideoaragatnaşyk arkaly okuw sapagyny alyp bardy.
Sapagyň barşynda hormatly ilçi Türkmenistanyň we Hindistanyň arasynda saglygy goraýyş we derman senagaty ugurlarynda alnyp barylýan işler dogrusynda gyzykly we täsirli gürrüňleri berdi. Sapagyň dowamynda institutymyzyň “Ýaş diplomatyň sesi” atly internet gazetiniň habarçysy Mähriban Hudaýgulyýewa tarapyndan ilçä diplomatiýa ýoluna düşüşi, Türkmenistan bilen Hindistanyň arasynda hyzmatdaşlyk gatnaşyklarynyň has-da ösdürilmegi boýunça alnyp barylýan işler we olaryň geljegi barada birnäçe soraglar berlip, gyzykly söhbetdeşlik gurnaldy.
Okuw sapagynyň ahyrynda oňa gatnaşan talyplar hormatly ilçä Türkmenistan bilen Hindistanyň arasyndaky dostlukly we özara bähbitli hyzmatdaşlygy has-da ösdürmek ugrunda alyp barýan işlerinde rowaçlyk arzuw etdiler.
Gytja ATDAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň 1-nji ýyl talyby.