Ilçi bilen geçirilen duşuşyk
2024-nji ýylyň 3-nji iýulynda Türkmenistanyň Daşary işler ministrliginiň Halkara gatnaşyklary institutynda Nikaragua Respublikasynyň Türkmenistana täze bellenilen Adatdan daşary we Doly ygtyýarly Ilçisi(oturýan ýeri – Ankara şäheri) Tatýana Daniela Garsia Silwa bilen duşuşyk geçirildi. Oňa institutyň mugallymlary we talyp ýaşlary gatnaşdylar.
Duşuşygyň barşynda hormatly Ilçi Türkmenistan we Nikaragua Respublikasynyň arasyndaky syýasy-diplomatik, söwda-ykdysady we medeni-ynsanperwer çäklerde alnyp barylýan hyzmatdaşlygyň aýratynlyklary barada gürrüň berdi. Mundan başga-da hormatly Ilçi talyp ýaşlary özüniň diplomatiýada gazanan baý tejribesi bilen tanyşdyrdy.
Şeýle duşuşyklaryň gurnalmagy türkmen diplomatiýasynyň milli mekdebinde bilim alýan geljekki halkaraçy hünärmenlere özleriniň halkara gatnaşyklary we diplomatiýa ugurlarynda bilimlerini has-da artdyrmaga ýardam edýär.
Hojamyrat BAÝLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
II ýyl talyby.