HUSUSY KÄRHANADA GÖÇME OKUW SAPAGYNA GATNAŞYLDY
2023-nji ýylyň 8-nji maýynda Türkmenistanyň Daşary işler ministrliginiň Halkara gatnaşyklary instituty bilen Türkmenistanyň Senagatçylar we telekeçiler partiýasynyň Aşgabat şäher komitetiniň bilelikde guramagynda göçme okuw sapagy geçirildi. Institutyň Halkara ykdysady gatnaşyklary fakultetiniň “Ýaş ykdysatçylar” ylmy gurnagynyň agzalarynyň gatnaşmagynda geçirilen bu göçme okuw sapagyny ýurdumyzyň telekeçilik ulgamynyň wekilleri alyp bardy.
Göçme okuw sapagynda Türkmenistanyň Senagatçylar we telekeçiler partiýasynyň Aşgabat şäher komitetiniň agzasy we beýlekiler çykyş edip, Berkarar döwletiň täze eýýamynyň Galkynyşy döwründe hormatly Prezidentimiziň hususy pudagy ösdürmek babatda alyp barýan syýasatynyň durmuşa üstünlikli geçirilmegi netijesinde ýurdumyzda telekeçilik ulgamynyň täze belent sepgitlere çykandygyny nygtap aýtdylar. Şeýle-de “Türkmenistanyň 2021–2030-njy ýyllar üçin daşary söwda Strategiýasynyň” tassyklanylmagynyň netijesinde Türkmenistanyň hususy telekeçiligini ösdürmekde ýurdumyzda işewürligi goldamak boýunça döwlet maksatnamalarynyň amala aşyrylmagyna giň mümkinçilikleri açýandygyny bellediler.
2013-nji ýylda esaslandyrylan “Geljege miras” kärhanasynda guralan göçme okuw sapagynda kärhananyň hünärmeni ýokary hilli polimer önümlerini, ýagny dürli ölçegli haltalary, gurluşykda ulanylýan plasmas dýubelleri, şahsy gorag serişdesini (kaskany), miwe we bakja önümleri üçin plasmas sebetleri, polipropilen monofilament ýüplükleriniň dürli görnüşlerini öndürmekde meşhurlyk gazanan bu kärhana barada giňişleýin maglumat berdi. Ýeri gelende bellesek, ýokary hilli taýýar önümler GDA-nyň ýurtlaryna hem-de Türkiýä eksport edilýär. Okuw sapagynyň ahyrynda talyplar hünärmene özlerini gyzyklandyrýan sowallar bilen ýüzlenip, degişli jogaplary aldylar.
Şeýle göçme okuw sapaklarynyň yzygiderli guralmagy talyp ýaşlar - ýaş ykdysatçylar üçin tejribe alyşmakda we göni işewürlik gatnaşyklaryny ýola goýmakda bilelikdäki duşuşyklaryň, ylmy-amaly maslahatlaryň we beýleki çäreleriň geçirilişini öwrenmekde uly ähmiýeti bar.
Göçme okuw sapaga gatnaşyjylar ýaşlary telekeçilik işine giňden çekmekde berýän çäksiz goldawlary üçin hormatly Prezidentimize alkyş sözlerini aýtdylar.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň mugallymy.