Hoşniýetli gatnaşyklaryň täze nusgasy
2023-nji ýylyň 11-nji oktýabrynda, Aşgabat şäherinde geçirilýän «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara serginiň we ylmy maslahatyň çäklerinde Türkmenistanyň Daşary işler ministrliginiň Halkara gatnaşyklary instituty bilen Russiýa Federasiýasynyň W.N.Tatişew adyndaky Astrahan döwlet uniwersitetiniň arasynda özara düşünişmek hakynda Ähtnama gol çekildi. Bu gol çekilen Ähtnama iki döwletiň arasyndaky medeni-ynsanperwer ulgamyndaky gatnaşyklary pugtalandyrmakda özüniň mynasyp goşandyny goşar.
Türkmenistanyň we Russiýa Federasiýasynyň degişli ýokary okuw mekdepleriniň arasynda gol çekilen Ähtnamanyň çäginde geljekde okuw seminarlaryny guramak, ylmy-amaly maslahatlary we barlaglary geçirmek, akademiki çärelere gatnaşmak üçin özara çakylyklary, makalalary, okuw we görkezme gollanmalaryny, okuw maksatnamalaryny alyşmak ýaly ugurlarda hyzmatdaşlyk ediler. Şeýlelikde, iki dostlukly ýurduň ýokary okuw mekdepleriniň mugallymlarynyň we talyplarynyň arasyndaky gatnaşyklar has-da işjeňleşdiriler.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa
kafedrasynyň uly mugallymy.