HINDISTANYŇ TÜRKMENISTANDAKY ILÇIHANASYNDA “HINDISTANYŇ MILLI JEBISLIK GÜNI” BELLENILDI
2025-nji ýylyň 31-nji oktýabrynda Hindistanyň Türkmenistandaky Ilçihanasynda Hindistanyň Milli Jebislik güni hem-de Hindistanyň syýasy integrasiýasynda möhüm orun oýnan Sardar Wallabhai Pateliň doglan gününiň 150 ýyllygyna bagyşlanan çäre geçirildi. Bu dabaraly çärä Türkmenistanyň Daşary işler ministrliginiň Halkara gatnaşyklary institutynyň mugallymlary hem gatnaşdylar.
Mälim bolşy ýaly, Hindistanyň Milli Jebislik güni 2014-nji ýyldan başlap her ýylyň 31-nji oktýabrynda baýramçylyk hökmünde bellenilýär. Bu baýramyň maksady ýurduň bitewüligini, agzybirligini we halklaryň arasynda dostluk hem-de jebislik duýgusyny berkitmekdir. Bu gün Hindistanyň meşhur şahsyýetleriniň biri, ýurduň “demir adamy” diýlip atlandyrylýan Sardar Wallabhai Pateliň doglan güni bilen gabat gelýär. Milli Jebislik gününde Hindistanyň dürli künjeklerinde ýörişler, sport we medeni çäreler hem-de “Run for Unity” (Jebislik üçin ylgaw) atly ýörite çäre geçirilýär. Çünki Hindistanyň Milli Jebislik güni her bir raýatyň ýüreginde öz ýurdunyň ykbalyna jogapkärçilik duýgusyny artdyrýar we olaryň arasynda doganlyk gatnaşyklaryny güýçlendirýär.
Ilçihanada geçirilen çärede hem Hindistanyň Türkmenistandaky täze bellenen Adatdan daşary we Doly ygtyýarly ilçisi Bandaru Wilsonbabu gutlag sözleri bilen çykyş etdi. Soňra baýramçylyk mynasybetli hindi sazlary we tanslary, şeýle hem Hindistanda döran, asylly däbe öwürlen ýoga sungaty boýunça çykyşlar görkezildi.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.