HGI — TDU: hasap 6:2
Ýurdumyzyň ýokary okuw mekdepleriniň talyplarynyň arasynda akyldar şahyrymyz Magtymguly Pyragynyň doglan gününiň 300 ýyllygy mynasybetli yglan edilen brain-ring bäsleşiginiň dowam edýändigini web-saýtymyz arkaly ozal size habar beripdik. 2023-nji ýylyň 21-nji maýynda Türkmenistanyň Telekommunikasiýalar we informatika institutynda bäsleşigiň nobatdaky tapgyry geçirildi. Bu tapgyrda Türkmenistanyň Daşary işler ministrliginiň Halkara gatnaşyklary institutynyň talyplar topary akyldar şahyrymyzyň adyny göterýän ýurdumyzyň iň baýry ýokary okuw mekdebiniň talyplary bilen bäsleşdiler.
Ýaryşda kimdir biri üstün çykmaly, ýene biri ýeňilmeli. Bäsleşigiň bu gezekki tapgyry hem örän çekeleşikli we dartgynly ýagdaýda geçdi. Geljekki halkaraçy hünärmenler garşydaşyny — Magtymguly adyndaky Türkmen döwlet uniwersitetiniň talyplar toparyny 6:2 hasabynda ýeňip, duşuşygy örän şowly jemlediler. Bu ýeňiş geljekki halkaraçy žurnalistleriň ýokary taýýarlygynyň, türkmeniň akyldar şahyry Magtymguly Pyragynyň döredijiligi bilen içgin gyzyklanýandygynyň nobatdaky beýanyna öwrüldi.
Talyplarymyzy ajaýyp ýeňşi bilen gutlap, olara geljekki tapgyrlarda-da üstünlikleriň hemra bolmagyny arzuw edýäris!
Türkmenistanyň Daşary işler ministrliginiň Halkara gatnaşyklary institutyndan düzülen toparyň düzümi:
1. Mätgurban Mätgurbanow, Halkara žurnalistikasy fakultetiniň 2-nji ýyl talyby.
2. Gurbansähet Gurbansähedow, Halkara žurnalistikasy fakultetiniň 2-nji ýyl talyby.
3. Rahym Şameýew, Halkara žurnalistikasy fakultetiniň 3-nji ýyl talyby.
4. Bägül Kakalyýewa, Halkara žurnalistikasy fakultetiniň 2-nji ýyl talyby.
5. Atamyrat Ýazweliýew, Halkara žurnalistikasy fakultetiniň 1-nji ýyl talyby.
6. Aýşirin Döwletowa, Halkara žurnalistikasy fakultetiniň 1-nji ýyl talyby.
Topary bäsleşige taýýarlaýan jogapkär mugallym:
Mähriban Gandymowa, Žurnalistikanyň nazaryýeti we amalyýeti kafedrasynyň müdiri.
Taňryberdi MYRATLYÝEW,
Türkmenistanyň Daşary işler ministrliginiň
Halkara gatnaşyklary institutynyň mugallymy.