Halypa žurnalistler bilen döredijilik duşuşygy
2021-nji ýylyň 4-nji iýunynda “Zenan kalby” žurnalynyň redaksiýasynda şu ýylyň 9-njy fewralynda hormatly Prezidentimiziň sanly wideoaragatnaşyk arkaly geçiren maslahatynda beren tabşyryklaryny ýerine ýetirmek maksady bilen Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň gurnamagynda “Türkmen halkynyň parahatçylyk söýüjilik sypatlary edebi eserlerde” atly döredijilik duşuşygyny geçirildi. Duşuşyga “Zenan kalby” žurnalynyň redaksiýasynyň halypa žurnalistleri we Halkara gatnaşyklary institutynyň Halkara žurnalistikasy fakultetiniň mugallymlarydyr talyplary gatnaşdylar.
Duşuşygyň dowamynda “Zenan kalby” žurnalynda zähmet çekýän Ogulgözel Şagulyýewa, Keýik Umarowa, Ýazgül Annaýewa, Amangül Nurmyradowa ýaly halypa žurnalistler çykyş etdiler. Olar öz çykyşlarynda talyplara hormatly Prezidentimiziň “Parahatçylyk sazy – dostluk, doganlyk sazy” atly kitabynda, türkmen edebiýatynyň görnükli wekilleriniň eserlerinde beýan edilýän anyk gahrymanlaryň keşbinde jemlenen watançylyk, parahatsöýüjilik, agraslyk, asyllylyk, sabyrlylyk, kanagatlylyk ýaly ajaýyp gylyk-häsiýetler barada gürrüň berdiler. Çykyşlarda türkmen şahyrlarymyzyň ata-babalarymyzdan miras galan gylyk-häsiýetleri açyp görkezýän goşgy setirler hem dowamly öz beýanyny tapmagy duşuşygyň täsirini artdyrdy.
Şeýle-de duşuşygyň dowamynda ýaş žurnalistler halypa žurnalistlere özlerini gyzyklandyrýan sowallaryny berip, žurnalistika hünäri bilen baglanyşykly özara pikir alyşdylar we degerli maslahatlary aldylar.
Duşuşygyň ahyrynda oňa gatnaşyjylar halypa-şägirtlik ýoluny ösdürmekde döredilýän mümkinçilikler üçin Gahryman Arkadygymyza alkyş sözlerini aýtdylar.
Gyzlargül ANNAGURDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.