Halypa fotožurnalist amaly sapakda
2021-nji ýylyň 27-nji fewralynda Türkmenistanyň Daşary işler ministrliginiň Halkara gatnaşyklary institutynda Halkara žurnalistikasy fakultetiniň talyplary üçin halypa-şägirtlik ýörelgesi esasynda amaly sapak geçirildi. Žurnalistikanyň nazaryýeti we amalyýeti kafedrasy tarapyndan guralyp, hormatly Prezidentimiziň 2020-nji ýylyň 23-nji dekabrynda sanly wideoaragatnaşyk arkaly geçiren iş maslahatynda ýokary derejeli žurnalistleri taýýarlamaga aýratyn üns bermek baradakytabşyryklaryny ýerine ýetirmek maksady bilengeçirilen bu amaly sapagy “Нейтральный Туркменистан“ gazetiniň fotožurnalisti Hasan Magadow alyp bardy.
Ýurdumyzyň tanymal žurnalisti amaly sapagyň barşynda ýaş žurnalistlere Berkarar döwletimiziň bagtyýarlyk döwründe hormatly Prezidentimiziň taýsyz tagallalary bilen Diýarymyzda sanly fotografiýa işiniň ösdürilişi, şeýle hem dünýäde fotografiýanyň we foto-studiýalaryň döreýiş taryhy, fotožurnalistikanyň inçe syrlary barada gürrüň berdi, talyplara foto apparatlaryň dürli görnüşlerini görkezdi. Sapakda tejribeli habarçynyň 1888-nji ýylda ilkinji “Kodak” foto-studiýasynyň açylyşy,1935-nji ýylda fototelegrafyň ulanylyp başlanylyşywe bu ulgamdaky beýleki möhüm wakalar barada beren maglumatlary talyplarda uly gyzyklanma döretdi.
Amaly sapagyň ahyrynda halypa-şägirtlik ýörelgesi bilen ýaş žurnalistleriň çuňňur bilim almaklary üçin ähli mümkinçilkleri döredip berýän hormatly Prezidentimize alkyş sözleri aýdyldy.
Aýsenem ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.