HALYPA DIPLOMATYŇ GATNAŞMAGYNDA OKUW SAPAGY GEÇIRILDI
2025-nji ýylyň 24-nji dekabrynda Türkmenistanyň Daşary işler ministrliginiň Halkara gatnaşyklary institutynda Halkara gatnaşyklary we diplomatiýa kafedrasynyň guramagynda halypa diplomatyň gatnaşmagynda «Garaşsyz, baky Bitarap Türkmenistanyň saglygy goraýyş ulgamynda halkara hyzmatdaşlygynyň esasy ýörelgeleri» atly okuw sapagy geçirildi. Okuw sapagyny Türkmenistanyň Adatdan daşary we Doly ygtyýarly ilçisi, «Türkmenistanyň ussat diplomaty» atly tapawutlandyryş nyşanynyň eýesi Sapar Berdinyýazow alyp bardy.
Sapagyň dowamynda halypa diplomat hormatly Prezidentimiziň parasatly baştutanlygynda ýurdumyzda milli saglygy goraýyş ulgamyny toplumlaýyn ösdürmekde hem-de kämilleşdirmekde halkara hyzmatdaşlyga aýratyn ähmiýet berilýändigini we bu ugurda netijeli işleriň durmuşa geçirilýändigini aýratyn belläp, muňa Türkmenistanyň BMG we onuň ýöriteleşdirilen edaralary hem-de agentlikleri bilen saglygy goraýyş pudagynda ýakyndan işjeň gatnaşyklary ýola goýýandygyny mysal getirdi. Şeýle hem halypa diplomat yzygiderli guralýan halkara forumlaryň we maslahatlaryň çäklerinde ýurdumyzyň öňe sürýän başlangyçlary lukmançylyk ugry boýunça ylmy hyzmatdaşlygy ösdürmäge giň şertleri döredýändigini nygtady.
Şeýle sapaklaryň türkmen diplomatiýasynyň milli mekdebinde yzygiderli geçirilmegi talyp ýaşlaryň syýasy düşünjeleriniň hem-de bu ugurda goşmaça bilim endikleriniň kämilleşmegine uly goşant goşýar.
Zybagözel HALDURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 4-nji ýyl talyby.