Halkaraçy žurnalistleriň nobatdaky döredijilik üstünligi
2023-nji ýylyň 23-nji dekabrynda Türkmenistanyň Jemgyýetçilik guramalarynyň merkezinde «Türkmenistan» gazetiniň redaksiýasynyň Türkmenistanyň Magtymguly adyndaky Ýaşlar guramasynyň Merkezi geňeşi bilen bilelikde Arkadag Serdarly bagtyýar ýaşlar ýylynda hormatly Prezidentimiziň baştutanlygynda durmuşa geçirilýän beýik işleri açyp görkezmek hem-de wagyz etmek maksadyndan ugur alnyp yglan edilen «Ýaşlar — beýik geljegi gurujylar» atly döredijilik bäsleşiginiň ýeňijilerini sylaglamak dabarasy boldy.
Bu döredijilik bäsleşigi ýaşlary döredijilige höweslendirmek, olaryň zehinini açmak maksady bilen guraldy. Şunlukda, Arkadag Serdarly bagtyýar ýaşlar ýylynda durmuşa geçirilen beýik işleri, döwletiň içeri we daşary syýasatyndaky ornuny, türkmen ýaşlarynyň halk hojalygynyň dürli ugurlarynda, halkara giňişliginde gazanýan üstünliklerini anyk mysallar arkaly publisistik äheňde açyp görkezýän makalalardyr oçerkleriň, söhbetdeşlikleriň jemi 100-e golaýy hasaba alyndy. Emin agzalaryň gelen netijesine görä, eserleriň iň mynasyplary bäsleşigiň ýeňijileri hökmünde kesgitlenildi. Ýeňijiler bäsleşigi guraýjylar tarapyndan Hormat hatlarydyr gymmat bahaly sowgatlar bilen sylaglanyldy. Olaryň arasynda Türkmenistanyň Daşary işler ministrliginiň Halkara gatnaşyklary institutynyň halkara žurnalistikasy fakultetiniň talyplary Aýlar Atajykowanyň we Gurbansähet Gurbansähedowyň hem bardygy has-da buýsandyryjydyr. Biz hem talyp deň-duşlarymyzy nobatdaky gazanan üstünlikleri bilen tüýs ýüregimizden gutlaýarys. Geljekde hem üstünlikleriňiziň höwri köp, galamyňyzyň ujy ýiti bolsun ýaş žurnalistler!
Maksat REJEPOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.