Halkara zenanlar gününe bagyşlanan dabara
Ýaz paslynyň ilkinji günleri gözelligi we näzikligi alamatlandyrýan Halkara zenanlar gününe gabat gelýär. Ine, şeýle ajaýyp baýramçylyk mynasybetli 2021-nji ýylyň 2-nji martynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimiziň pul sowgatlary gowşuryldy we döredijilik duşuşygy geçirildi. Institutyň jemgyýetçilik guramalary tarapyndan gurnalan duşuşyga paýtagtymyzdaky Magtymguly adyndaky Milli sazly-drama teatrynyň, Beýik Saparmyrat Türkmenbaşy adyndaky Baş drama teatrynyň sahna ussatlary, Maýa Kulyýewa adyndaky Türkmen milli konserwatoriýasynyň mugallymlary, institutyň professor-mugallymlary we talyp gelin-gyzlary gatnaşdylar.
Duşuşykda sungat ussatlary söýgi, gözellik, näziklik, ýagşylyk we ýagşy umytlar ýaly düşünjeler bilen aýrylmaz baglanyşykly bolan zenan keşbi, onuň belent mertebesi, hormatly Prezidentimiziň saýasynda häzirki wagtda ýurdumyzda zenanlara goýulýan belent sarpa barada buýsanç bilen belläp geçdiler. Baýramçylyk çäresinde institutyň zenan mugallymlaryna we talyp gelin-gyzlaryna “Halkara zenanlar güni” mynasybetli pul sowgatlary gowşuryldy.
Döredijilik duşuşygynyň dowamynda Türkmenistanyň at gazanan artistleri Gülşirin Annamyradowa we Aýgül Ýagşyýewa türkmen halkynyň mizemez gymmatlyklaryny, milli mirasymyzy, mähriban Watanymyzyň ösüşlerini, maşgala ojagyna wepaly mährem zenanlarymyzy wasp edýän ajaýyp aýdym-sazlary uly joşgun bilen ýerine ýetirdiler.
Laçyn BERDIMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.