“Halkara ulag-üstaşyr geçelgeleri: özara arabaglanyşyk we ösüş - 2024” atly halkara maslahaty we sergisi öz işine başlady.
2024-nji ýylyñ 26-njy noýabrynda “Halkara ulag-üstaşyr geçelgeleri: özara arabaglanyşyk we ösüş - 2024” atly halkara maslahaty we sergisi öz işine başlady. Söwda-senagat edarasynda geçirilýän halkara foruma dünýäniň 40-dan gowrak ýurdundan 600-e golaý wekil gatnaşdy. Olaryň hatarynda ugurdaş döwlet we hususy düzümleriň, halkara guramalaryň, şol sanda BMG-niň, ÝHHG-niň, Bütindünýä bankynyň we Türkmenistandaky diplomatik wekilhanalaryň, şeýle hem köpçülikleýin habar beriş serişdeleriniň wekilleri bar.
Şeýle hem foruma Türkmenistanyň Ministrler Kabinetiniň Başlygynyň orunbasarlary, birnäçe ministrlikleriň we pudaklaýyn dolandyryş edaralaryň ýolbaşçylary hem-de wekilleri gatnaşdylar. Forumyň dowamynda ulaglaryň özara baglanyşygyny ýokarlandyrmak, strategik hyzmatdaşlygy ösdürmek, durnukly we inklýuziw ulag ulgamlary boýunça netijeli çözgütleri işläp taýýarlamak hem-de “ýaşyl” tehnologiýalary ornaşdyrmak, sanly transformasiýa, ekologiýa taýdan arassa logistikany goldamak we durnukly ulag barada jemgyýetçiligiň habardarlygyny artdyrmak ýaly meselelere garaldy.
Häzirki döwürde ulag ulgamyndaky gatnaşyklary hil taýdan täze derejä çykarmak babatda Türkmenistanyň öňe sürýän başlangyçlary bu ugurda tagallalary birleşdirmäge ýardam edýär.
Şeýle halkara forumlarynyň geçirilmegi durnukly ulag ulgamynda halkara hyzmatdaşlygyny has-da giňeltmäge mümkinçilik berip, Türkmenistanyň halkara üstaşyr ulag ulgamlaryndaky ähmiýetini aýdyň görkezer. Türkmenistanyň Gündogar – Günbatar, Demirgazyk – Günorta ulag geçelgelerindäki ornuny, multimodal ýük geçirijilik boýunça innowasion mümkinçiliklerini dünýä ýaýmaga giň ýol açar.
Aýnur HUDAÝBERGENOWA,
Türkmenistanyñ Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.