HALKARA SERGI WE MASLAHAT ÖZ IŞINE BAŞLADY
2023-nji ýylyň 10-njy oktýabrynda paýtagtymyzdaky Söwda-senagat edarasynda «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara sergi öz işine başlady. Oňa Hökümet agzalary, Mejlisiň deputatlary, ministrlikleriň we pudaklaýyn dolandyryş edaralarynyň, jemgyýetçilik guramalarynyň wekilleri, daşary ýurtlaryň Türkmenistanda işleýän diplomatik wekilhanalarynyň, halkara guramalaryň ýolbaşçylary, daşary ýurtly myhmanlar, Senagatçylar we telekeçiler birleşmesiniň agzalary, türkmen işewürleri, daşary ýurt kompaniýalarynyň wekilleri, ýurdumyzyň ýokary okuw mekdepleriniň mugallymlary, talyp ýaşlary we köpçülikleýin habar beriş serişdeleriniň wekilleri gatnaşdylar.
Türkmenistanyň saglygy goraýyş işgärleriniň hünär baýramyna bagyşlanan sergini Türkmenistanyň Saglygy goraýyş we derman senagaty ministrligi, Türkmenistanyň Bilim ministrligi, Türkmenistanyň Bedenterbiýe we sport baradaky döwlet komiteti, Türkmenistanyň Söwda-senagat edarasy bilen bilelikde gurady. Halkara guramalaryň, daşary ýurtlaryň derman serişdeleri we lukmançylyk maksatly önümleri, lukmançylyk, sport enjamlaryny öndürmäge, bilim tehnologiýalaryny işläp taýýarlamaga ýöriteleşen 30-dan gowrak ýurdundan 150-den gowrak kompaniýanyň wekilleriniň sergä gatnaşandygyny aýtmak has-da ýakymly. Hormatly Prezidentimiziň belleýşi ýaly, Garaşsyz, hemişelik Bitarap ýurdumyzyň ilatynyň saglygy, abadan we bagtyýar durmuşy biziň alyp barýan işlerimiziň esasy maksadydyr. Bedenterbiýe we sport bolsa jemgyýetiň sagdynlygyny üpjün edýän, halklary we döwletleri jebisleşdirýän güýçdür.
Günüň ikinji ýarymynda bolsa onuň çäklerinde ylmy maslahat geçirildi. Utgaşykly görnüşde geçirilen ylmy maslahat dünýäniň 20-ä golaý döwletinden daşary ýurtlaryň öňdebaryjy ýokary okuw mekdepleriniň alymlaryny, professorlaryny bir ýere jemledi. Halkara sergi öz işini 12-nji oktýabra çenli dowam eder.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.