HALKARA MASLAHATA GATNAŞAN ÝAŞLAR SYLAGLANYLDY
2025-nji ýylyň 30-njy awgustynda Türkmenistanyň Daşary işler ministrliginiň Halkara gatnaşyklary institutynda şu ýylyň 4-8-nji awgusty aralygynda “Awaza’’ milli syýahatçylyk zolagynda geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatyna ýurdumyzyň ýokary okuw mekdeplerinden saýlanyp alnan meýletinçileri, terjimeçileri, we ýaş habarçy-wagyzçylary sylaglamak dabarasy geçirildi. Oňa ýurdumyzyň ýokary okuw mekdepleriniň professor-mugallymlarydyr talyp ýaşlary gatnaşdylar. Halkara maslahatyň we onuň çäklerinde geçirilen forumlaryň ýokary guramaçylykly geçirilmegi üçin öz mynasyp goşantlaryny goşan ýaşlara Türkmenistanyň Magtymguly adyndaky Ýaşlar guramasy tarapyndan hormat hatlary we gymmat bahaly sowgatlar gowşuryldy.
Dabaraly maslahatyň ahyrynda sylaglanan ýaşlar möhüm ähmiýetli maslahatlara meýletinçi, terjimeçi, we ýaş habarçy-wagyzçy hökmünde gatnaşyp, tejribe toplamaga, özlerini kämilleşdirmäge uly mümkinçilikleri döredýän Gahryman Arkadagymyzyň hem-de hormatly Prezidentimiziň janlarynyň sag, ömürleriniň uzak bolmagyny, tutýan tutumly işleriniň elmydama rowaçlyklara beslenmegini arzuw etdiler.
Bägül SAPARMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
II ýyl talyby.