HALKARA HUKUKÇYLAR ÜÇIN GEÇIRILEN OKUW SAPAGY
2026-njy ýylyň 14-nji maýynda Türkmenistanyň Daşary işler ministrliginiň Halkara gatnaşyklary institutynda Gazagystan Respublikasynyň L.N.Gumilew adyndaky Ýewraziýa milli uniwersitetiniň doktory Pulatow Şerzod Abbozowiçiň, filosofiýa kafedrasynyň müdiri Şakirow Symbat Ekebaýewiçiň, şeýle-de filosofiýa kafedrasynyň dosenti Amangeldiýew Asan Azimhanowiçiň gatnaşmagynda okuw sapagy geçirildi. Türkmen-gazak ylym-bilim hyzmatdaşlygynyň çäklerinde guralan bu okuw sapagyna institutymyzyň Halkara hukugy fakultetiniň talyplary, magistrantlary hem-de mugallymlary uly gyzyklanma bilen gatnaşdylar.
Okuw sapagynyň dowamynda wekiller özüniň alyp barýan ylmy-barlag işleriniň ugurlary, häzirki zaman diplomatiýasynyň inçe tilsimleri we etnosyýasy meseleleri dolandyrmagyň ähmiýeti barada giňişleýin maglumat berdiler. Şerzod Abbozowiç halkara tejribesinde medeniýetara gatnaşyklaryň we parahatçylyk dialogynyň orny baradaky garaýyşlaryny paýlaşyp, talyplaryň bu ugurdaky sowallaryna jikme-jik jogap berdi.
Geçirilen okuw sapagy Gazagystan Respublikasynyň öňdebaryjy ýokary okuw jaýynda berilýän bilimiň we ylmy gözlegleriniň netijelerini ulanmaga, şeýle hem ýaşlary ylmy iş bilen meşgullanmaga we halkara bilim giňişligine goşulmaga höweslendirmeklige uly mümkinçilik döreder.
Gatnaşyjylar üçin örän ähmiýetli bolan bu okuw sapagy, talyplaryň saýlap alan hünärlerine bolan gyzyklanmasyny has-da artdyrdy we wekilleriň halkara derejesindäki tejribesi geljekki hünärmenler üçin nusgalyk mekdep boldy.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş kafedrasynyň uly mugallymy