Halkara forumy geçirildi
2021-nji ýylyň 31-nji martynda Türkmenistanyň Söwda-senagat edarasynda “Muhammet Baýram han Türkmen we türkmen halkynyň mertlik, watansöýüjilik, adamkärçilik ýörelgeleri” atly halkara forumy geçirildi. Dünýäniň 18 ýurdundan 77 ylmy işgäriň gatnaşmagy meýilleşdirilen bu forum sanly wideoaragatnaşyk arkaly alnyp baryldy.
Halkara forum öz işini esasy mejlisden soňra dört bölümçede dowam etdi. Forumyň ikinji bölümçesi “Türkmenistanyň Prezidenti Hormatly Gurbanguly Berdimuhamedowyň parahatçylyk we ynanyşmak taglymatynyň halkara gatnaşyklaryndaky orny” ady bilen Türkmenistanyň Daşary işler ministrliginiň Halkara gatnaşyklary institutynda geçirildi. Türkmenistanyň Milli Bilim institutynyň direktory Baýram Bäşimowyň alyp barmagynda geçirilen bu halkara foruma Halkara gatnaşyklary institutynyň, Türkmen döwlet maliýe institutynyň, Ýagşygeldi Kakaýew adyndaky Halkara nebit we gaz uniwersitetiniň, Türkmen döwlet binagärlik-gurluşyk institutynyň professor-mugallymlary sanly wideoaragatnaşyk ulgamy arkaly gatnaşdylar.
Forumda çykyş edenler Türkmenistanyň halkara gatnaşyklarynda öňe sürýän parahatsöýüjilik, hoşniýetli goňşuçylyk syýasaty, şeýle hem abadançylyk, ösüş we ynsanperwerlik taglymatlary barada gürrüň etdiler. Halkara forumynda edilen çykyşlar oňa gatnaşyjylarda uly täsir galdyrdy.
Gurbanjemal EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby