HALK MASLAHATYNYŇ AGZASY BILEN DUŞUŞYK GEÇIRILDI
2025-nji ýylyň 9-njy oktýabrynda Türkmenistanyň Daşary işler ministrliginiň Halkara gatnaşyklary institutynda Aşgabat şäheriniň Berkararlyk etrap Halk maslahatynyň agzasy Laçyn Nepesowa bilen duşuşyk geçirildi. Oňa türkmen diplomatiýasynyň milli mekdebiniň talyp ýaşlary gatnaşdylar. Duşuşygyň dowamynda döwleti dolandyrmakda bäş müňýyllyk şöhratly taryhy bolan halkymyzyň asylly däp-dessurlarynyň Berkarar döwletiň täze eýýamynyň Galkynyşy döwründe türkmen halkynyň Milli Lideri, Türkmenistanyň Halk maslahatynyň Başlygy Gahryman Arkadagymyzyň saýasynda, hormatly Prezidentimiz Arkadagly Gahryman Serdarymyzyň parasatly baştutanlygynda mynasyp dowam etdirilýändigini, Türkmenistanyň Halk maslahatynyň halk häkimiýetiniň iň ýokary wekilçilikli edarasydygyny, onuň jemgyýetiň ähli gatlaklaryndan wekilleriň, şol sanda ýaş nesilleriň hem döwlet ähmiýetli meseleleriň çözgüdine gatnaşmagy üçin mäkäm köpri bolup durýandygy barada aýratyn bellenildi. Soňra talyp ýaşlar myhmana özlerini gyzyklandyrýan sowallar bilen ýüzlenip, degerli jogaplary aldylar.
Ýurdumyzyň röwşen geljeginiň, ýagty ertirleriniň kepili bolan ýaş nesiller bilen şeýle duşuşyklaryň yzygiderli geçirilmegi, olaryň syýasy düşünjeleriniň kämilleşmegine, goşmaça bilimleriniň artmagyna, dünýägaraýşynyň giňelmegine uly goşant goşýar.
Leýli MURADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.