GYZYKLY GEÇEN BÄSLEŞIK
2025-nji ýylyň 29-njy aprelinde Türkmenistanyň Daşary işler ministrliginiň
Halkara gatnaşyklary institutynda Jemgyýeti öwreniş ylymlary kafedrasynyň
guramagynda «Ýewropa we Amerika ýurtlarynyň taryhy» dersi boýunça 1-nji ýyl
talyplaryň arasynda bäsleşik geçirildi. Bäsleşigiň maksady bu ýerde bilim alýan
ýaşlary dünýä taryhy boýunça oňat baş çykarýan, halkara gatnaşyklarynyň
ösmegine mynasyp goşant goşýan hünärmenleri taýýarlap ýetişdirmekden
ybaratdyr.
Gyzykly geçen bäsleşikde ähli fakultetleriň hersinden 7 talypdan ybarat bolan
toparlar özara bäsleşdiler. Bäsleşigiň şertlerine görä gatnaşyjylar dürli usullardan
peýdalanyp, öz toparlary bilen tanyş etdiler. Garşydaş toparlaryň hersi özlerine
mahsus şygarlary oýlap tapypdyrlar we ýörite nyşanlary döredipdirler. Soňra bolsa
toparlar öz saýlap alan ýurdy bilen Türkmenistanyň arasynda ýola goýlan syýasy-
diplomatik, halkara ykdysady we medeni-ynsanperwer gatnaşyklar hem-de olaryň
ösüşi barada giňişleýin gürrüň berdiler. Şunda çykyş edýän agzanyň gürrüň beriş
ussatlygyna, dilewarlygyna hem üns berildi. Bäsleşigiň üçünji şertine laýyklykda,
toparlar emin agzalary tarapyndan berlen sowallara jogap berdiler. Çekeleşikli
geçen bäsleşigiň netijesi boýunça baýrakly orunlara mynasyp bolan toparlar
ýadygärlik sowgatlar bilen sylaglandy.
Nurana ARNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.