Gyşky dynç alşyň nobatdaky güni
2021-nji ýylyň 27-nji ýanwarynda Türkmenistanyň Daşary işler ministrliginiň Halkara gatnaşyklary institutynda talylaryň gyşky dynç alyş möwsümini guramaçylykly geçirmek maksady bilen ýurdumyzyň Alp Arslan adyndaky Milli drama teatrynyň döredijilik işgärleriniň gatnaşmagynda duşuşyk geçirildi. Oňa institutyň Halkara ykdysady gatnaşyklary hem-de Halkara žurnalistikasy fakultetiniň talyplary we mugallymlary gatnaşdylar. Duşuşygyň başynda teatryň agzybir işgärleri talyp ýaşlar bilen özara pikir alyşdylar. Soňra bolsa teatryň döredijilik işgärleriniň ýerine ýetirmeginde birnäçe gülküli sahna oýunlary görkezildi. Duşuşygyň dowamynda Tahyr Mämmedowyň “Gala” spektaklyndan okap beren monology, Şiri Saparowyň “Ene” hakynda, şeýle hem Gülşat Meňliýewanyň terbiýeçilik äheňli ýerine ýetiren goşgulary tomaşaçylarda uly täsir galdyrdy. Bu döredijilik duşuşygynda ýerine ýetirilen sahna oýunlary tomaşaçylara ruhy lezzet, şatlyk duýgusyny paýlady we dowamly el çarpyşmalara mynasyp boldy. Täsirli geçen duşuşygyň ahyrynda ýurdumyzyň halkara derejedäki at-abraýyny barha belende galdyrýan, halkyny parahat, asuda günlerde, abadan durmuşda ýaşadýan hormatly Prezidentimiziň adyna alkyşlar aýdyldy.
Laçyn Berdimyradowa,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.