GÖNI WIDEOARAGATNAŞYK ARKALY AÇYK SAPAK GEÇIRILDI
Türkmenistanyň hemişelik Bitaraplygynyň 30 ýyllygy, BMG-niň Baş Assembleýasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmegi mynasybetli hem-de Türkmenistanyň Halkara parahatçylyk we ynanyşmak ýylynyň dowamyndaky işleriniň hem-de ugurlarynyň Konsepsiýasyna laýyklykda, 2025-nji ýylyň 12-nji fewralynda Türkmenistanyň Daşary işler ministrliginiň Halkara gatnaşyklary institutynda “Türkmen Bitaraplygynyň filosofiki esaslary” hakynda göni wideoaragatnaşyk arkaly açyk sapak geçirildi. Sapagy Türkenistanyň Daşary işler ministrliginiň Halkara gatnaşyklary institutynyň uly mugallymy, filosofiýa ylymlarynyň kandidaty Ogulgurban Ezimowa alyp bardy. Göni wideoaragatnaşyk arkaly geçirilen açyk sapaga ýurdumyzyň ähli ýokary we orta hünär okuw mekdeplerinden talyplar gatnaşdylar.
Açyk sapagyň başynda institutymyzyň uly mugallymy, filosofiýa ylymlarynyň kandidaty Ogulgurban Ezimowa taryhy taýdan geçen gysga döwrüň dowamynda Garaşsyz Türkmenistan ähli döwletler we halklar bilen ylalaşykda ýaşamagyň, dost-doganlyk gatnaşyklaryny ösdürmgiň özboluşly tejribesini toplandygyny hem-de dünýäniň ylalaşdyryjy merkezine öwrülendigini belledi. Şeýle hem, 2015-nji ýylyň 3-nji iýulynda BMG-niň Baş Assembleýasynyň 69-njy mejlisinde “Türkmenistanyň hemişelik Bitaraplygy” Rezolýusiýasynyň gaýtadan kabul edilmegi munuň aýdyň subutnamasydyr. Berkarar döwletiň täze eýýamynyň Galkynyşy döwründe türkmen bitaraplygy dünýäde syýasy durnuklylygy üpjün etmegiň hem-de milli bähbitleri goramagyň, dost-doganlyk gatnaşyklaryny ösdürmegiň möhüm girewidir. Halypa mugallym “Bitaraplyk - bu biziň dünýäde parahatçylygy ündeýän, halklary bagtyýarlyga çagyrýan hem-de ynsanperwerligi wagyz edýän ýörelgelerimizi dünýä ýaýýan taglymatdyr’’ diýip milli Liderimiz Bitaraplyk ýörelgesiniň örän giň we çuň filosofiki ähmiýetini belleýändigi hakynda giňişleýin gürrüň berdi. Şeýle-de filosofiýa ylymlarynyň kandidaty, halypa mugallym Türkmenistan öz Bitaraplygynyň täze filosofiýasyny dünýä bileleşigine beýan edýär, ol bolsa diňe Merkezi Aziýa sebitlerinde däl-de, eýsem, tutuş Ýer ýüzünde ynsanperwerligi, parahatçylyk söýüjiligi, açyklygy, ynanyşmagy, halkara gatnaşyklaryny kämilleşdirmegi, global häsiýetli meseleleri çözmekde giň gerimli we uzak möhletleýin hyzmatdaşlygy ösdürmegi ündeýär diýip aýratyn nygtady.
Täsirli geçen açyk sapagyň ahyrynda talyplar özlerini gyzyklandyrýan soraglara jogap tapdylar.
Eneş GURBANDURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.