GÖNI ARAGATNAŞYK ARKALY OKUW MASLAHATY GEÇIRILDI
2022-nji ýylyň 10-njy martynda Türkmenistanyň Daşary işler ministrliginiň Halkara gatnaşyklary institutynda ÝUNESKO-nyň Almaty şäherindäki Klaster býurosynyň Gazagystanyň Al-Farabi adyndaky Milli uniwersiteti bilen bilelikde guramagynda žurnalistika boýunça göni aragatnaşyk arkaly okuw maslahaty geçirildi. Oňa Halkara ynsanperwer ylymlary we ösüş uniwersitetiniň hem-de Türkmenistanyň Daşary işler ministrliginiň Halkara gatnaşyklary institutynyň professor-mugallymlary we talyp ýaşlary onlaýn görnüşinde gatnaşdylar.
ÝUNESKO-nyň aragatnaşygy ösdürmek boýunça halkara maksatnamasynyň çäklerinde ýokary hilli žurnalistika bilimini halkara ülňülerine laýyklykda öwretmekde köpçülikleýin sanly platformasy ulgamyny kämilleşdirmekde tagallalary birikdirmeklige bagyşlanan okuw maslahatynda çykyş edenler žurnalistika bilimini ýokarlandyrmagyň çäklerinde halkara tejribesi bilen bagly gyzykly gürrüňleri berdiler. Mälim bolşy ýaly, 2021-nji ýylyň 24-25-nji oktýabrynda institutymyz bilen Gazagystanyň Al-Farabi adyndaky Milli uniwersitetiniň arasynda özara düşünişmek hakynda Ähtnama gol çekilipdi. Şol Ähtnamanyň çäklerinde geçirilýän bu okuw maslahatynda pikirleriň alşylmagy geljekki halkaraçy žurnalistleriň bilimini has-da kämilleşdirmeklige uly itergi berer.
Talyp ýaşlaryň özlerini gyzyklandyrýan temalar boýunça soraglary bermekligi okuw maslahatyň täsirini has-da artdyrdy.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.