Göçme okuw sapagy geçirildi
2022-nji ýylyň 9-njy iýunynda Türkmenistanyň Daşary işler ministrliginiň Halkara gatnaşyklary institutynyň Türkmenistanyň diplomatiýasynyň möhüm ugurlary boýunça okuw merkeziniň guramagynda ulag diplomatiýasy boýunça nobatdaky göçme okuw sapagy «Türkmen Logistika» Assosiýasiýasynyň agzasy «At-abraý» hojalyk jemgyýeti ulag-ekspeditorlyk kärhanasynda geçirildi. Okuw sapagyna Türkmenistanyň Daşary işler ministrliginiň Halkara gatnaşyklary institutynyň, Türkmenistanyň Inžener-tehniki we ulag kommunikasiýalar institutynyň professor-mugallymlary we talyp ýaşlary gatnaşdylar. 2013-nji ýylda esaslandyrylan «At-abraý» hojalyk jemgyýeti ýurdumyzda iň uly logistika kompaniýalarynyň biri bolup, ulag-ekspeditorçylyk pudagyna degişli ähli hyzmatlary, ýagny howa, deňiz, awtoulag we demirýol arkaly ýük gatnawlary, konteýner daşamalarynyň amatly görnüşlerini hödürleýär. Göçme okuw sapagynda hojalyk jemgyýetiniň hünärmenleri dünýäniň ähli künjekleri boýunça müşderiniň talaplaryna laýyklykda ýöriteleşdirilen ulag çözgütlerini işläp düzmek we durmuşa geçirmek amallaryny amatly şertlerde ýerine ýetirýändikleri barada gürüň berdiler. Göçme okuw sapagynyň dowamynda talyp ýaşlar kärhananyň alyp barýan işleri barada özlerini gyzyklandyrýan soraglaryny berdiler.
Şyhmyrat SÖÝÜNOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
2-nji ýyl talyby.