GELJEGIŇ DIPLOMATIÝASY: TÄZEÇIL USULLAR WE EMELI AŇ
2026-njy ýylyň 12-nji maýynda Türkmenistanyň Daşary işler ministrliginiň Halkara gatnaşyklary institutynda Eýran Yslam Respublikasynyň Daşary işler ministrliginiň Halkara gatnaşyklary institutynyň wekili, tejribeli diplomat, doktor Seýed Agaha Banihaşeminiň gatnaşmagynda okuw sapagy geçirildi. Türkmen-eýran ylym-bilim gatnaşyklarynyň barha rowaçlanýan döwründe guralan bu çäre institutymyzyň mugallymlary we talyplary üçin tejribe alyşmagyň täze meýdançasyna öwrüldi.
Okuw sapagynyň esasy temasy «Halkara gatnaşyklaryny we syýasy ylymlary okatmagyň täze usulyýeti hem-de emeli aňyň häzirki wagtdaky orny» diýlip atlandyryldy. Doktor Banihaşemi öz çykyşynda häzirki zaman diplomatiýasynda sanly tehnologiýalaryň, aýratyn hem emeli aňyň (EA) maglumatlary seljermekde, daşary syýasy çözgütleri kabul etmekde we diplomatik gepleşikleri modelirlemekde tutýan orny barada giňişleýin durup geçdi. Şeýle hem, sapagyň dowamynda halkara gatnaşyklaryny okatmagyň innowasion usullary, talyplaryň seljeriş ukyplaryny ösdürmek we nazary bilimleri amalyýet bilen utgaşdyrmagyň ähmiýeti barada gyzykly pikirler öňe sürüldi. Myhman diplomat halkara tejribesinden mysallary getirip, emeli aňyň diplomatiýadaky mümkinçilikleri we bu ugurdaky kiberhowpsuzlyk meseleleri baradaky sowallara jikme-jik jogap berdi.
Geçirilen bu okuw sapagy bilim bermek bilen bir hatarda talyplaryň saýlap alan hünärine bolan gyzyklanmasyny artdyrmaga, olaryň dünýä derejesindäki täzeçil ylmy garaýyşlar bilen tanyşmagyna uly ýardam etdi.
Ogulçynar MAGTYMGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 1-nji ýyl talyby