«Garaşsyz Türkmenistan halkara habarlar giňişliginde» atly media-forum geçirildi
2022-nji ýylyň 5-nji sentýabrynda «Arçabil» myhmanhanasynda ýurdumyzyň halkara habarlar giňişligindäki ornuna bagyşlanan «Garaşsyz Türkmenistan halkara habarlar giňişliginde» atly media-forum geçirildi. Media-foruma Türkmenistanyň Döwlet habarlar agentliginiň, Telewideniýe, radiogepleşikler we kinematografiýa baradaky döwlet komitetiniň, gazet-žurnallaryň redaksiýalarynyň wekilleri, şeýle hem ýurdumyzyň ýokary okuw mekdepleriniň žurnalistika hünärinde bilim alýan talyplary gatnaşdylar. Forumda Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy hünäriniň III ýyl talyby Yhlas Atamyradow Türkmenistan döwletimiziň gazanan üstünliklerini hem-de ýurdumyzda amala aşyrylýan giň gerimli özgertmeleri wagyz etmekde köpçülikleýin habar beriş serişdeleri ulgamynda halkara hyzmatdaşlygy ösdürmegiň ähmiýeti dogrusynda çykyş etdi. Çäräniň dowamynda oňa gatnaşyjylar daşary ýurtly hyzmatdaşlar bilen ozal baglaşylan halkara resminamalaryň ýerine ýetirilişi, geljekki edilmeli işler we öňde durýan wezipeler dogrusynda pikir alyşdylar. Media-foruma sanly ulgam arkaly TASS agentliginiň baş direktory, «Türkmenistan» halkara žurnalynyň baş redaktory, şeýle hem «Ria Nowosti», «Russiýa Today» agentlikleriniň žurnalistleri gatnaşdylar.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.
Şeýle-de bu barada okap bilersiňiz:
https://salamnews.tm/section/jemgyyet/medeniyet/asgabatda-kopculikleyin-habar-beris-serisdelerinin-halkara-maslahaty-gecirildi-34c055