Fransuz diliniň halkara güni mynasybetli «Bahar pasly we edebiýat» atly dil hepdeligi geçirildi
2025-nji ýylyň 14-20-nji martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň we Fransiýa Respublikasynyň arasynda diplomatik gatnaşyklaryň ýola goýulmagynyň 33 ýyllygy, Türkmenistanda fransuz diliniň okadylmagynyň 30 ýyllygy we Fransuz diliniň halkara güni mynasybetli Dünýä dilleri kafedrasy we kafedranyň «Lingvo World» ylmy gurnagy tarapyndan «Le printemps et la littérature» («Bahar pasly we edebiýat») atly dil hepdeligi geçirildi.
Hepdeligiň başynda Fransiýa Respublikasynyň Türkmenistandaky ilçihanasy we ilçihananyň ýanyndaky Fransuz instituty tarapyndan her ýyl geçirilýän «Frankofoniýa» bäsleşikleriniň çäklerinde Türkmenistanyň fransuz dili dersi okadylýan ýokary okuw mekdepleriniň talyplarynyň arasynda dürs ýazuw, düzme ýazmak, aýdym aýtmak bäsleşikleriniň saýlama tapgyrlary geçirildi.
Hepdeligiň dowamynda «Le printemps et la littérature» («Bahar pasly we edebiýat») atly diwar gazetleriniň bäsleşigi, çeper okaýyş (Magtymguly Pyragynyň fransuz diline terjime edilen goşgulary; parahatçylyk, dost-doganlyk; bahar pasly we edebiýat baradaky şygyrlar) we aýdym aýtmak bäsleşikleri gurnaldy.
2025-nji ýylyň 18-nji martynda fransuz dilini ikinji daşary ýurt dili hökmünde öwrenýän Türkmenistanyň ýokary okuw mekdepleriniň talyplarynyň arasynda geçirilen «Le pays de la langue étudiée» («Meniň öwrenýän dilimiň ýurdy») atly zehin bäsleşiginde institutymyzyň talyplary I orny eýelediler. Ähli bäsleşikleriň ýeňijileri emin agzalary tarapyndan yglan edildi we hormat hatlary, ýadygärlik sowgatlary bilen sylaglandylar.
Hepdeligiň dowamynda Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň dosenti, tehniki ylymlaryň kandidaty, Türkmenistanyň Adatdan daşary we Doly ygtyýarly ilçisi, Türkmenistanyň ussat diplomaty Çary Nyýazowyň talyplar üçin fransuz dilindäki ýörite umumy okuw sapagy geçirildi.
2025-nji «Halkara parahatçylyk we ynanyşmak ýylynda» ýurdumyzyň ýokary okuw mekdepleriniň arasynda özara bähbitli gatnaşyklary ýola goýmak we berkitmek, zehinli talyp ýaşlary ýüze çykarmak, talyp ýaşlary ylmy-barlag işlerine ugrukdyrmak we talyplaryň daşary ýurt dillerini, hususan-da, fransuz dili boýunça bilimlerini çuňlaşdyrmak, ýokary hünärli, ähli taraplaýyn bilimli hünärmenleriň taýýarlanylmagyny üpjün etmek ýaly wezipelerden ugur alan bu hepdeligiň geçirilmegi biz halkaraçy talyplaryň fransuz dili boýunça ukyp-başarnyklarymyzyň ösmegine we kämilleşmegine ýardam etdi.
Aýjahan TAGYÝEWA,
Türkmenistanyň Daşary işler
ministrliginiň
Halkara gatnaşyklary
institutynyň
Halkara gatnaşyklary
fakultetiniň III ýyl talyby.