Fransuz dili boýunça ders bäsleşiginde üstünlik gazanan mekdep okuwçylaryny sylaglamak dabarasy
2022-nji ýylyň 30-njy aprelinde Türkmenistanyň Daşary işler ministrliginiň Halkara gatnaşyklary institutynda Fransiýa Respublikasynyň Türkmenistandaky Ilçihanasynyň ýanyndaky Fransuz dili okuw merkezi tarapyndan Aşgabat şäheriniň fransuz dili okadylýan orta mekdepleriniň okuwçylarynyň arasynda fransuz dili boýunça 2022-nji ýylyň aprel aýynda wideo aragatnaşyk arkaly Türkmenistanda ikinji gezek geçirilen ders bäsleşiginiň ýeňijilerini yglan etmek we sylaglamak dabarasy geçirildi. Bu dabara Fransiýa Respublikasynyň Türkmenistandaky Adatdan daşary we Doly ygtyýarly Ilçisi hanym Izabel Ginel, Fransuz dili okuw merkeziniň direktory jenap Roman Guwerne, merkeziň wekilleri, Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa, Aşgabat şäheriniň orta mekdepleriniň fransuz dili mugallymlary we mekdep okuwçylary gatnaşdylar.
Dabarany Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa açyp, ders bäsleşiginde üstünlik gazanan mekdep okuwçylaryny gutlady hem olara okuwlarynda üstünlikleri arzuw etdi. Dabarada Fransiýa Respublikasynyň Türkmenistandaky Adatdan daşary we Doly ygtyýarly Ilçisi hanym Izabel Ginel çykyş edip, bu ders bäsleşigine Aşgabat şäheriniň 9 sany fransuz dili okadylýan orta mekdeplerinden okuwçylaryň gatnaşandygyny we ders bäsleşiginiň temasynyň fransuz-türkmen gatnaşyklarynyň taryhy babatynda geçirilendigini belledi.
Aşgabat şäheriniň fransuz dili okadylýan orta mekdeplerinden 2 dereje boýunça ( 5-nji hem-de 9-njy synp okuwçylary) I, II we III orny eýelän ýeňijiler yglan edildi. Ýeňijiler Türkmenistanyň Bilim ministrliginiň we Fransiýanyň Ilçihanasynyň diplomlary hem bäsleşigiň hemaýatkärleri bolan VINCI Construction we Bouygues Turkmen kompaniýalary, «Tissot» şweýsar sagat firmasy, «la Boutique de Paris» dükany, «La Tartine» fransuz çörek bişirilýän kärhanasy we «Dessange» gözellik salony tarapyndan taýýarlanan sowgatlar bilen sylaglanyldy. Bu ders bäsleşigine işjeň gatnaşan okuwçylara hem höweslendiriji sowgatlar gowşuryldy.
Şahnoza EMINOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň IV ýyl talyby.
https://www.turkmenistan.gov.tm/tk/habar/62848/olimpiada-po-francuzskomu-yazyku