Fakt anyklamak we multimedia kontentini döretmek boýunça okuw maslahaty geçirildi
2026-njy ýylyň 22-23-nji iýulynda Ýewropada Howpsuzlyk we Hyzmatdaşlyk Guramasynyň Aşgabatdaky Merkeziniň guramagynda «Fakt anyklamak gurallary we multimedia kontentini döretmek» atly okuw sapagy geçirildi. Oňa Türkmenistanyň Mejlisiniň, Ýokary kazyýetiniň, Adalat ministrliginiň, Döwlet, hukuk we demokratiýa institutynyň, Döwlet habarlar agentliginiň, Halkara habarlar merkeziniň, Magtymguly adyndaky Türkmen döwlet uniwersitetiniň hem-de Türkmenistanyň Daşary işler ministrliginiň Halkara gatnaşyklary institutynyň, şeýle hem köpçülikleýin habar beriş serişdeleriniň wekilleri gatnaşdylar.
Okuw maslahatynda belarusly tälimçi-ekspert Witaliý Rugaýn hem-de täjigistanly tälimçi-ekspert Rustam Gulow onlaýn görnüşde çykyş etdiler. Olar, degişlilikde, «NotebookLM» bilen tanyşlyk, uly göwrümli resminamalar bilen işlemek, infografika we prezentasiýa döretmek üçin gurallar, emeli aňyň kömegi bilen maglumatlaryň dogrulygyny barlamak hem-de multimedia mazmunyny döretmek üçin gurallaryň umumy syny (Gemini, Meta AI, Higgsfield, Suno), waýbkoding (Vibecoding) we onuň gurallary (Claude Code we Google AI Studio) dogrusynda giňişleýin gürrüň berdiler.
Iki gün dowam eden okuw sapagynyň barşynda köpçülikleýin habar beriş serişdeleriniň we döwlet edaralarynyň maglumat bilen işleşmek başarnyklaryny kämilleşdirmäge gönükdirilen okuw maslahatynyň dowamynda internetde we sanly mediada ýaýraýan maglumatlaryň, habarlaryň dogrulygyny barlamak, galp maglumatlaryň öňüni almak üçin niýetlenen döwrebap gurallary özleşdirmek, habarlary diňe tekst görnüşinde däl, eýsem, infografika, wideo, audio ýaly köp taraply wizual serişdeler bilen baýlaşdyryp, köpçülige ýetirmek bilen bagly maglumatlar aýdyldy.
Mundan başga-da, okuw maslahatynyň dowamynda degişli temalar boýunça sorag-jogap alşyldy.
Oguloraz EÝEBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň uly mugallymy