Eýran Yslam Respublikasynyň ýöriteleşdirilen ykdysady sergisi
2023-nji ýylyň 15-nji fewralynda paýtagtymyzyň Söwda senagat edarasynyň binasynda Eýran Yslam Respublikasynyň ýöriteleşdirilen ykdysady sergisiniň açylyşy boldy. Üç günläp dowam etjek bu serginiň açylyş dabarasyna Türkmenistanyň ministrlikleriniň we pudaklaýyn dolandyryş edaralarynyň hünärmenleri, Senagatçylar we telekeçiler birleşmesiniň agzalary, türkmen işewürleri, daşary ýurt kompaniýalarynyň wekilleri, şeýle hem ýurdumyzyň raýatlary, ýokary okuw mekdepleriniň talyplary, şol hatarda milli diplomatiýamyzyň ýokary mekdebiniň talyplary gatnaşdylar.
Türkmenistan Garaşsyzlygyny alandan soňky 30 ýyldan gowrak döwrüň içinde Eýran Yslam Respublikasynyň ykdysady sergisi paýtagtymyzda birnäçe gezek geçirilip gelinýär. Eýran döwletiniň iri kompaniýalarynyň onlarçasy gatnaşýan bu ýylky sergi öňki sergilerden eksponatlarynyň has baýlygy bilen tapawutlanýar. Sergä gatnaşyjylar pawilýonlarda Eýran Yslam Respublikasynyň nebit-gaz, senagat, gurlyşyk, oba hojalyk, söwda, lukmançylyk we beýleki ulgamlaryna degişli eksponatlar bilen giňden tanyşmaga mümkinçilik aldylar. Eýran hem-de türkmen tarapynyň işewür adamlarynyň gepleşikler geçirmegi serginiň işine baý many-mazmun berdi.
Türkmen paýtagtynda dostlukly ýurduň senagatynyň gazananlarynyň däbe görä geçirilýän sergisi Türkmenistanyň we Eýranyň arasyndaky söwda-ykdysady gatnaşyklary berkitmäge, iki goňşy ýurduň işewür toparlarynyň hyzmatdaşlygynyň özara bähbitli ugurlaryny we mümkinçiliklerini öwrenmäge möhüm goşant boldy.
Serginiň işi dowam edýär.
Kakageldi AKMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.