ENELERIŇ MÄHRI – BITARAPLYGYMYZYŇ SYNMAZ SÜTÜNI
2023-nji ýylyň 2-nji dekabrynda Türkmenistanyň hemişelik Bitaraplygynyň 28 ýyllyk baýramy mynasybetli Türkmenistanyň Zenanlar birleşiginiň Merkezi Geňeşiniň, Türkmenistanyň Daşary işler ministrliginiň Halkara gatnaşyklary institutynyň ilkinji Zenanlar guramasynyň bilelikde guramagynda şanly Bitaraplygymyzyň 28 ýyllygy mynasybetli «Eneleriň mähri – Bitaraplygymyzyň synmaz sütünidir» ady bilen aýdym-sazly duşuşyk geçirildi.
Duşuşyga Türkmenistanyň Mejlisiniň deputaty, «Bereketli Garagum» döwlet tebigy goraghanasynyň ylmy bölüminiň kiçi ylmy işgäri, Türkmenistanyň Söwda we ykdysady aragatnaşyklar ministrliginiň «Biznes reklama» gazetiniň habarçysy, Aşgabat şäheriniň 39-njy orta mekdebiniň müdiriniň okuw işleri boýunça orunbasary, Bagtyýarlyk etrap Halk maslahatynyň agzasy we institutymyzyň mugallymlary we talyplary gatnaşdylar.
Çykyş edenler tutuş türkmen halkyny we talyp ýaşlary Halkara Bitaraplyk baýramy bilen gutlap, Bitaraplygymyzyň Watanymyza beren miweleri, enelerimiziň bagty, buýsanjy dogrusynda täsirli gürrüňleri etdiler. Duşuşygyň institutymyzyň döredijilik topary tarapyndan taýýarlanan aýdym-sazly çykyşlar bilen utgaşmagy bu ajaýyp güne has-da täsirli öwüşgin çaýdy.
Duşuşygyň ahyrynda oňa gatnaşyjylar güneşli Diýarymyzy bagtyýar nesilleriň we mähriban eneleriň iň arzyly arzuwdyr islegleriniň hasyl bolýan mekanyna öwren hormatly Prezidentimize, türkmen halkynyň Milli Lideri Gahryman Arkadagymyza çäksiz alkyş sözlerini aýtdylar.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.