«EKSPO — 2025» Bütindünýä sergisi öz işine başlady
2025-nji ýylyň 13-nji aprelinde Ýaponiýanyň Osaka şäherinde dünýäniň iň uly halkara sergileriniň biri bolan «EKSPO — 2025» Bütindünýä sergisi dabaraly ýagdaýda öz işine başlady. Serginiň açylyş dabarasyna Ýaponiýada iş saparyny amala aşyrýan Arkadagly Gahryman Serdarymyzyň baştutanlygyndaky türkmen wekiliýeti hem gatnaşdy. Şeýle-de bu halkara sergä dünýäniň 160-dan gowrak döwleti gatnaşýar.
Mälim bolşy ýaly, Türkmenistan hem «EXPO-2025» Bütindünýä sergisinde milli pawiliýony bilen işjeňlik görkezýär. Sergidäki pawiliýonda Türkmenistanyň ykdysady ösüşi, medeniýeti, tebigy baýlyklary hem-de durnukly geljege gönükdirilen innowasion taslamalary şöhlelendirilýär. Diýarymyzyň «EXPO-2025» Bütindünýä sergisi gatnaşmagy ýurdumyza halkara derejesinde täze mümkinçilikleri açýar. Bu bolsa, Watanymyzyň «Açyk gapylar» syýasatyny üstünlikli durmuşa geçirýändigini görkezýär. Hormatly Prezidentimiziň Ýaponiýanyň resmi wekilleri bilen bilelikde Türkmenistanyň milli pawilýonyna baryp görmegi serginiň täsirliligini has-da artdyrdy. Türkmenistan bilen gyzyklanýan dünýä jemgyýetçiliginiň ünsüni özüne çekdi.
«EKSPO — 2025» Bütindünýä sergisi 2025-nji ýylyň 13-nji aprelinden 13-nji oktýabryna çenli dowam eder.
Rejepbaý ALYMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.