Döwür we žurnalistika
2023-nji ýylyň 16-njy maýynda Türkmenistanyň Daşary işler ministrliginiň Halkara gatnaşyklary institutynda halypa žurnalistleriň gatnaşmagynda «Döwür we žurnalistika» atly döredijilik duşuşygy geçirildi. Oňa «Türkmenistan» gazetiniň baş redaktory Kakamyrat Rejepow, «Nesil» gazetiniň baş redaktory Artykguly Hojaberdiýew, «Biznes reklama» gazetiniň baş redaktory Seýitmyrat Geldiýew, halypa žurnalist Gurbannazar Orazgulyýew, şeýle-de institutyň halkara žurnalistikasy fakultetiniň mugallymlarydyr talyp ýaşlary gatnaşdylar.
Duşuşyk Berkarar döwletiň täze eýýamynyň Galkynyşy döwründe ata-babalarymyzyň halypa-şägirtlik ýaly asylly ýörelgelerine pugta eýerilýändiginiň nobatdaky subutnamasy boldy. Munuň özi akyldar şahyrymyz Magtymguly Pyragynyň doglan gününiň 300 ýyllygynyň dabaralandyrylýan günlerinde aýratyn mazmuna eýedir. Magtymguly Pyragynyň döredijilik mirasy ýaş nesiller üçin ylham çeşmesidir, dünýä akyl ýetirmegiň nusgasydyr.
Halypa žurnalistler hem-de mugallymlar özleriniň täsirli çykyşlarynda hormatly Prezidentimiziň alyp barýan parasatly döwlet syýasaty, ýaşlara döredilýän mümkinçilikler, türkmen halkynyň Milli Lideri Gahryman Arkadagymyzyň kitaplarynyň ýaşlaryň durmuşyndaky orny, ýurdumyzda žurnalistikanyň ösüşi, ýaş žurnalistlere döredilýän mümkinçilikler dogrusynda giňişleýin durup geçdiler. Bellenilişi ýaly, şeýle duşuşyklaryň yzygiderli geçirilmegi dörediji ýaşlaryň ýüze çykmagyna, olaryň bu ugurda ugrukmagyna uly goldawdyr. Halypa žurnalistleriň talyplar bilen durmuş we hünär tejribesini paýlaşmaklary, olaryň öz döredijilik ugruny kesgitlemäge itergi berýär.
Döredijilik duşuşygynyň dowamynda talyp ýaşlar bilim alýan ugurlarynda özlerini gyzyklandyrýan sowallar bilen halypa žurnalistlere ýüzlendiler. Şeýle-de ýaşlara okamaga, döretmäge döredip berýän giň mümkinçilikleri üçin hormatly Prezidnetimize, Gahryman Arkadagymyza alkyş sözlerini aýtdylar.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.