«Döwlet gullugynyň edebi we diplomatik protokolyň esaslary» atly okuw sapagy
2022-nji ýylyň 27-nji maýynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiniň talyplarynyň we «Ýaş diplomatlar» mekdebiniň agzalarynyň gatnaşmagynda «Döwlet gullugynyň edebi we diplomatik protokolyň esaslary» atly okuw sapagy geçirildi. Bu okuw sapagyny Türkmenistanyň Prezidentiniň ýanyndaky Döwlet gullugy akademiýasynyň professory Öwezdurdy Muhammetberdiýew alyp bardy.
Halypa professor duşuşugyň dowamynda halkara gatnaşyklarynda diplomatik protokolyň düzgünleri we olaryň aýratynlyklary barada giňişleýin gürrüň berip, döwletleriň diplomatik gatnaşyklarynyň taryhyndan maglumatlary mysal getirdi.
Duşuşygyň dowamynda talyplar we mekdep okuwçylary özlerini gyzyklandyrýan sowallary bilen ýüzlendiler.
Duşuşygyň ahyrynda eden täsirli çykyşy üçin halypa professora mekdep okuwçylary we talyplar özleriniň hoşallyklaryny beýan etdiler.
Batyr ESENOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.