Dil hepdeliginiň çäklerinde Fransuz diliniň güni bellenildi
2026-njy ýylyň 21-nji aprelinde Türkmenistanyň Daşary işler ministrliginiň Halkara gatnaşyklary institutynda «Diller — dostluk çemeni» atly dil hepdeliginiň çäklerinde Fransuz diliniň güni bellenildi. Dünýä dilleri kafedrasy tarapyndan guralan çäreler ýaşlaryň dil bilimlerine bolan höwesini artdyrmakda, bu ugurda özara tejribe alyşmakda möhüm ähmiýete eýedir.
Hepdeligiň dowamynda «Fransuz diliniň burçy» gurnalyp, institutyň 1-nji ýyl talyplary tarapyndan türkmen, arap, hytaý, iňlis, fransuz, rus we ispan dillerinde Watan hakyndaky goşgular okaldy. Aýratyn-da, Gahryman Arkadagymyzyň «Türkmenistan — parahatçylygyň we ynanyşmagyň Watany» atly goşgusynyň türkmen we fransuz dillerinde ýerine ýetirilmegi, şeýle hem Magtymguly Pyragynyň şygyrlarynyň fransuzça terjimesiniň okalmagy dabaranyň mazmunyny baýlaşdyrdy.
Häzirki wagtda türkmen diplomatiýasynyň milli mekdebinde fransuz diline hem aýratyn üns berilýär. Çünki fransuz dili BMG-niň we ÝUNESKO-nyň esasy dilleriniň biri hem-de halkara guramalarynyň birnäçesiniň resmi iş dili hasaplanylýar. Şunuň bilen baglylykda, dil hepdeliginiň dowamynda fransuz diline bagyşlanan ýörite sergi guralyp, onda fransuz dilindäki okuw kitaplary, talyplaryň taýýarlan diwar gazetleri, Gahryman Arkadagymyzyň fransuz diline terjime edilen kitaplary we Eýfel diňiniň maketi görkezildi.
Hepdeligiň meýilnamasyna laýyklykda, Fransuz diliniň gününde talyplar tarapyndan dürli dillerde nakyllar, türkmen-fransuz gatnaşyklary we Fransiýanyň döwlet nyşanlary barada gyzykly prezentasiýalar hödürlendi. Mundan başga-da, Wiktor Gýugonyň goşgulary we Žan de Lafonteniň basnýalary esasynda taýýarlanylan sahnalar talyplaryň dil ukyplaryny we döredijilik zehinini görkezmäge mümkinçilik berdi. Halkara Frankofoniýa guramasyna bagyşlanan wideogörkezişler we zehin bäsleşikleri talyplaryň daşary ýurt dillerine bolan höwesini has-da artdyrmakda aýratyn ähmiýetlidir.
Jemläp aýdanyňda, «Diller — dostluk çemeni» atly dil hepdeliginiň çäklerinde Fransuz diliniň gününiň bellenilmegi talyplaryň diňe bir dil ukyplaryny kämilleşdirmän, eýsem, olaryň dünýä medeniýetine bolan garaýşynyň giňelmegine we türkmen-fransuz diplomatik gatnaşyklaryna bolan gyzyklanmasynyň artmagyna uly ýardam edýär. Bu çäreler geljekki diplomatlarda medeniýetara düşünişmek ukybyny kemala getirmek bilen, fransuz diliniň ähmiýetine ýene bir gezek ünsi çekýär.
Yslam GURBANMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 4-nji ýyl talyby.