Dil bilen dünýäni gezer
Döwletmämmet Azady adyndaky Türkmen milli dünýä dilleri institutynda “Berkarar döwletiň bagtyýarlyk döwründe talyplaryň ylmy we gözleg işleri” ady bilen ylmy maslahat geçirildi. Maslahata ýurdumyzyň ýokary okuw mekdepleriniň talyp ýaşlary gatnaşdylar.
Ylmy amaly maslahatyň işini talyplar iňlis dilinde alyp bardylar we ylmy gözlegler babatynda pikir alyşdylar. Ylmy maslahata işjeň gatnaşanlygy üçin Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň 3-nji ýyl talyby Jemal Rematullaýewa minnetdarlyk haty bilen sylaglandy. Bu bolsa biz, talyp ýaşlary ylmy iş bilen yzygiderli meşgullanmaga höweslendirdi.
Maslahatyň ahyrynda talyplar daşary ýurt dillerini öwrenmekde döredip berýän giň mümkinçilikleri üçin hormatly Prezidentimiziň janynyň sag bolmagyny, alyp barýan tutumly işleriniň mundan beýläk hem rowaçlyklara beslenmegini arzuw etdiler.
Laçyn HOJAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
III ýyl talyby