«Dialog – parahatçylygyň kepili» atly baýramçylyk dabarasy geçirildi
2025-nji ýylyň 13-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatik işgärleriniň güni mynasybetli Türkmenistanyň Kärdeşler arkalaşyklarynyň Milli merkezi, Türkmenistanyň Zenanlar birleşiginiň Merkezi Geňeşi, Türkmenistanyň Daşary işler ministrligi, Türkmenistanyň Daşary işler ministrliginiň Halkara gatnaşyklary instituty bilen bilelikde «Dialog – parahatçylygyň kepili» atly baýramçylyk dabarasy geçirildi.
Maslahatda Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa, Türkmenistanyň Kärdeşler arkalaşyklarynyň Milli merkeziniň, Türkmenistanyň Zenanlar birleşiginiň merkezi geňeşiniň başlygy Oguljennet Berdiliýewa, Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň dosenti, tehniki ylymlaryň kandidaty, Türkmenistanyň Adatdan daşary we Doly ygtyýarly Ilçisi, «Türkmenistanyň ussat diplomaty» atly tapawutlandyryş nyşanyň eýesi Çary Nyýazow, Türkmenistanyň Döwlet, hukuk we demokratiýa institutynyň direktory, hukuk ylymlaryň doktory Ýagmyr Nuryýew, Türkmenistanyň Mejlisiniň Kada-kanunçylyk baradaky komitetiniň başlygy Batyr Baýlyýew, Adalatçynyň Diwanynyň baş maslahatçysy Gurbangül Berkeliýewa dagylar Gahryman Arkadagymyzyň «Dialog – parahatçylygyň kepili» atly öňe süren filosofiýasynyň türkmen diplomatiýasyndaky orny, Hormatly Prezidentimiziň ýurdumyzyň diplomatik işgärlerine goýýan uly hormaty barada belläp geçdiler. Şeýle hem Türkmenistanyň diplomatik işgärleriniň güni mynasybetli Türkmenistanyň Kärdeşler arkalaşyklarynyň Milli merkeziniň adyndan Hormat hatlary we gymmat bahaly sowgatlary gowşurmak dabarasy geçirildi. Baýramçylyk dabarasynyň dowamynda Türkmenistanyň Daşary işler ministrliginiň Halkara gatnaşyklary institutynyň aýdym-saz we döredijilik toparynyň talyplarynyň ýerine ýetirmeginde ýurdumyzyň ösüşlerini wasp edýän aýdymlaryň birnäçesi ýerine ýetirildi.
Dabaranyň ahyrynda maslahata gatnaşyjylar Hormatly Prezidentimiziň we Gahryman Arkadagymyzyň janlarynyň sag, başlarynyň dik bolmagyny, alyp barýan il-ýurt bähbitli, umumadamzat ähmiýetli işleriniň rowaçlyklara beslenmegini arzuw etdiler.
Güljeren ATAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.