Çynar Rüstemowa “Türkmenistanyň Gahrymany”
Türkmenistanyň Daşary işler ministrliginiň ulgamynda köp ýyllap dürli ýurtlarda iň ýokary derejeli diplomatik wekil hökmünde abraýly zähmet çeken, BMG-niň Bilim, ylym we medeniýet boýunça guramasynyň (ÝUNESKO-nyň) işleri barada Türkmenistanyň Milli toparynyň jogapkär sekretary Çynar Rustemowa işinde gazanan üstünlikleri we birnäçe ýyllaryň dowamynda çeken yhlasly zähmeti üçin Hormatly Prezidentimiz Gurbanguly Berdimuhamedow halypa ilçä “Türkmenistanyň Gahrymany” diýen hormatly ady dakdy we “Altyn aý” altyn medalyny gowşurdy.
Ilçi, filosofiýa ylymlarynyň kandidaty Çynar Rustemowa Hormatly Prezidentimiziň elinden bu Şa serpaýyny kabul etmek bilen, munuň özi ähli türkmen gelin-gyzlaryna we diplomatlaryna döwletimiz tarapyndan bildirilen ýokary ynamyň alamatydygyny nygtady.
Täjigistan Respublikasynda, Hytaý Halk Respublikasynda, Mongoliýada, Demirgazyk Koreýada we Wýetnam Sosialistik Respublikasynda Türkmenistanyň Adatdan daşary we Doly ygtyýarly ilçisi bolup işlän döwründe türkmen diplomatiýasynyň ösüşine uly goşant goşan Çynar Rustemowa häzirki wagtda hem bu ugurdaky işlerini dowam edýär. Biz hem halypa ilçimiz Çynar Rustemowany ýokary sylagy bilen gutlap, türkmen diplomatiýasyny ösdürmekde alyp barýan işlerinde uly üstünlikleri arzuw edýäris.
Seýli ARYŞOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň 4-nji ýyl talyby.