“ÇAGALARYŇ HUKUKLARYNY GORAMAK – PARAHATÇYLYGY WE HOWPSUZLYGY KEPILLENDIRMEK” ATLY TEMA BOÝUNÇA WEBINAR GEÇIRILDI
2025-nji ýylyň 25-nji noýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hemişelik Bitaraplygynyň 30 ýyllygy we “Halkara parahatçylyk we ynanyşmak” ýyly mynasybetli “Çagalaryň hukuklaryny goramak – parahatçylygy we howpsuzlygy kepillendirmek” atly tema boýunça webinar geçirildi. Onda Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň uly mugallymy Merjen Gurbannazarowa çykyş etdi.
Webinara ýurdumyzyň ýokary we orta hünär okuw mekdepleriniň professor-mugallymlary we talyp ýaşlary onlaýn arkaly gatnaşdylar.
Webinarda mugallym ýurdumyzda çagalaryň hukuklaryny goramaklygyň milli we halkara hukuk esaslary, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň ähmiýeti we onuň halkara gatnaşyklaryndaky orny, Gahryman Arkadagymyzyň, Arkadagly Gahryman Serdarymyzyň baştutanlygynda sagdyn, watançy, päk ahlakly, merdana ýaş nesilleri kemala getirmek ugrunda üstünlikli durmuşa geçirilýän işler barada giňişleýin gürrüň berdi.
Bu okuw sapagy talyp ýaşlaryň ýurdumyzda çaganyň hukuklaryny goramak we bu ugurda alnyp barylýan halkara gatnaşyklaryndaky hyzmatdaşlygyň ähmiýetini öwrenmek boýunça bilimlerini artdyrmaga mümkinçilik döredýär.
Aknabat DURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 3-nji ýyl talyby.