Bütindünýä saglyk güni
2025-nji ýylyň 7-nji aprelinde ýurdumyzda Bütindünýä saglyk güni mynasybetli paýtagtymyzda hormatly Prezidentimiziň gatnaşmagynda köpçülikleýin welosipedli ýöriş geçirildi. Bu ýörişe Türkmenistanyň Daşary işler ministrliginiň Halkara gatnaşyklary institutynyň talyplary hem işjeň gatnaşdylar.
Mälim bolşy ýaly paýtagtymyzda hormatly Prezidentimiziň gatnaşmagynda köpçülikleýin welosipedli ýörişiň guralmagy, dürli sport çäreleriniň giň gerime eýe bolmagy sagdyn durmuş ýörelgeleriniň barha dabaralanýandygynyň subutnamasydyr. Ýurdumyzda geçirilmegi asylly däbe öwrülen welosipedli ýörişler dünýä ýurtlarynda baýramçylyk günlerinde dürli durmuş we ekologiýa taslamalaryny hem başlangyçlaryny goldamak maksady bilen guralýan jemgyýetçilik ähmiýetli çäreleriň giňden ýaýran görnüşleridir. Şunuň bilen baglylykda Türkmenistanyň Daşary işler ministrliginiň Halkara gatnaşyklary institutynda sport çäresi hem geçirildi. Welosiped aglaba wagtyny okuw bilen geçirýän ýaş nesil üçin sagdyn we işjeň durmuş ýörelgelerine eýermegiň netijeli usulydyr.
Şeýlelikde, şu gün paýtagtymyzda geçirilen köpçülikleýin welosipedli ýöriş halkymyzyň agzybirliginiň we jebisliginiň, Garaşsyz, Bitarap Watanymyzyň hiç wagt gymmatyny ýitirmejek ynsanperwer umumadamzat gymmatlyklaryna, durmuşa geçirýän parahatçylyksöýüjilik syýasatyna hem-de saýlap alan döredijilik ýoluna ygrarlydygynyň nobatdaky güwasi boldy.
Gülşat HAKYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.