BÜTINDÜNÝÄ ÇAGA GÜNI HEM-DE BITARAPLYK BAÝRAMY MYNASYBETLI MEKDEP OKUWÇYLARY BILEN ÝÖRITE OKUW SAPAGY GEÇIRILDI
2025-nji ýylyň 20-nji noýabrynda Türkmenistanyň Daşary işler ministrliginiň Halkara gatnaşyklary institutynyň Ýaş alymlar geňeşi hem-de institutymyzyň «Ýaş hukukçylar», «Ýaş diplomatlar» ylmy gurnaklarynyň guramagynda her ýylyň 20-nji noýabrynda bellenilýän «Bütindünýä çaga güni» hem-de Türkmenistanyň Bitaraplyk derejesiniň 30 ýyllygy mynasybetli Annanyýaz Artyk adyndaky daşary ýurt dillerini çuňlaşdyryp öwredýän ýöriteleşdirilen 68-nji orta mekdebiniň okuwçylary bilen ýörite okuw sapagy geçirildi.
Okuw sapagynyň dowamynda institutyň mugallymlary hem-de işjeň talyplary 1954-nji ýylda Birleşen Milletler Guramasynyň Baş Assambleýasy tarapyndan ýörite kabul edilen Kararnamasy esasynda her ýylyň 20-nji noýabrynda bellenilip geçilýän Bütindünýä çaga gününiň ähmiýeti hem-de bu günüň bellenilmeginiň esasy maksady barada giňişleýin prezentasiýalaryň hem-de wideorolikleriň üsti bilen gürrüň berdiler.
Şeýle-de Halkara parahatçylyk we ynanyşmak ýylynyň nyşanynyň many-mazmunyny, hemişelik Bitaraplygymyzyň gadyr-gymmadyny hem-de türkmen Bitaraplygynyň aýratynlygy barada hem çykyşlar guraldy. Okuw sapagynyň ahyrynda okuwçylar bilen sorag-jogap alşyldy. Soraglara takyk jogap beren okuwçylara sowgatlar gowşuryldy.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň uly mugallymy.