BMG-NIŇ WEKILLERINIŇ GATNAŞMAGYNDA OKUW SAPAGY
2025-nji ýylyň 20-nji maýynda Türkmenistanyň Daşary işler ministrliginiň Halkara gatnaşyklary institutynda BMG-niň Baş Sekretarynyň ýaşlar meselesi boýunça kömekçisi jenap Felipe Paullieriň ýolbaşçylygyndaky wekiliýetiň Türkmenistana saparynyň çäklerinde okuw sapagy geçirildi. Oňa ýurdumyzyň ýokary okuw mekdepleriniň we institutymyzyň prosfessor-mugallymlary, talyp ýaşlary, Durnukly ösüş maksatlarynyň ýaş ilçileri we Öňüni alyş diplomatiýasy akademiýasynyň diňleýjileri gatnaşdylar.
Okuw sapagynda wekiliýetiň ýolbaşçysy, BMG-niň Baş Sekretarynyň ýaşlar meselesi boýunça kömekçisi jenap Felipe Paullier we BMG-niň Ýaşlar meselesi boýunça edarasynyň maglumat seljeriş işleri boýunça hünärmeni jenap Tomas Malik çykyş etdiler. BMG-niň hünärmenleri «Gün tertibi – 2030» gazanmakda Durnukly ösüş maksatlarynyň durmuşa geçirilmeginde ýaş nesliň orny barada gürrüň berdiler. Şol sanda, Durnukly ösüş boýunça ileri tutulýan derwaýys meseleler babatyndaky Türkmenistanyň oňyn we yzygiderli garaýyşlary, BMG-niň Merkezi Aziýa üçin öňüni alyş diplomatiýasy boýunça Sebit merkeziniň ştab-kwartirasyny ýurduň paýtagty Aşgabat şäherinde ýerleşdirmek baradaky kararyň kabul edilmeginiň hem möhüm ähmiýete eýedigi barada nygtalyp geçildi.
Şeýle hem, Durnukly ösüş maksatlaryna ýetmekde Türkmenistan döwletimiziň halkara başlangyçlarynyň we tagallalarynyň ägirt uly ähmiýeti barada bellenildi. Okuw sapagynyň dowamynda talyp ýaşlar hünärmenlerden özlerini gyzyklandyran soraglar boýunça jogaplary aldylar.
Okuw sapagy tamamlanandan soňra, hormatly myhmanlar institutyň içinde hereket edýän Türkmen diplomatiýasynyň taryhy muzeýine aýlanyp gördiler. Ol ýerde Türkmenistanyň daşary syýasatyny we onuň taryhyny şöhratlandyrýan ajaýyp eserler bilen tanyşdylar.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.