BMG-niň döredilmeginiň 79 ýyllygyna bagyşlanan bäsleşik
2024-nji ýylyň 25-nji oktýabrynda Birleşen Milletler Guramasynyň döredilen güni mynasybetli Türkmenistanyň Daşary işler ministrliginiň Halkara gatnaşyklary institutynda breýn-ring bäsleşigi geçirilip, oňa ähli fakultetleriň talyplary hem-de magistrleri işjeň gatnaşdylar. Bäsleşik Halkara hukugy fakultetiniň Halkara hukugy we deňeşdirme hukuk öwreniş kafedrasynyň «Ýaş hukukçylar» ylmy gurnagy tarapyndan guraldy.
Mälim bolşy ýaly, Birleşen Milletler Guramasynyň döredilmegine 79 ýyl boldy. Bu abraýly gurama tarapyndan iki gezek ykrar edilen Bitarap döwlet hökmünde Türkmenistan halkara giňişlikde işjeň syýasaty alyp barýar hem-de BMG we onuň ýöriteleşdirilen edaralary bilen uzak ýyllaryň dowamynda netijeli gatnaşyklary saklaýar. Şoňa görä-de, ýokary guramaçylykly geçirilen bu bäsleşik halkara gatnaşyklarynda halkara hukugynyň ähli subýektleriniň arasynda gatnaşyklary utgaşdyrmakda, ählumumy parahatçylygy hem-de howpsuzlygy üpjün etmekde esasy orny eýeleýän Birleşen Milletler Guramasy we onuň işiniň esasy ugurlary boýunça talyp ýaşlaryň bilimlerini artdyrmaga gönükdirilendir.
Bäsleşige «Diplomatiýa», «Ýurissiýa», «Kalkussiýa» we «Pressiýa» diýlip atlandyrylan döwletlerden ybarat bolan 4 topar gatnaşyp, her toparda talyplaryň we magistrleriň 8-si çykyş etdi. 4 şertden ybarat bolan bäsleşikde oňa gatnaşyjylar Birleşen Milletler Guramasy bilen bagly soraglara jogap berdiler, dünýä döwletleriniň döwlet nyşanlaryny we paýtagtlaryny ýatdan bilmek hem-de aýry-aýry döwletleriň BMG bilen bagly daşary syýasatyna degişli soragnama jogap bermek boýunça bäsleşdiler. Toparlaryň berlen waka bilen bagly halkara gatnaşyklaryň gatnaşyjysy hökmünde öz döwletleriniň ornuny giňişleýin beýan edip bilmekleri geljekki halkaraçy hünärmenleriň tejribesini baýlaşdyrdy.
Ýeňiji bolan toparlara Hormat hatlary we ýadygärlik sowgatlary gowşuryldy.
Mekan SALYHOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.