BMG-niň Aşgabatdaky Hemişelik wekilhanasynda ÝUNISEF-iň treningi geçirildi
2025-nji ýylyň 12 ― 17-nji maýy aralygynda Türkmenistanyň Daşary işler ministrligi bilen Birleşen Milletler Guramasynyň Çagalar gaznasynyň (ÝUNISEF) guramagynda Aşgabatdaky BMG-niň Hemişelik wekilhanasynda «Çagalary etiki tarapdan şöhlelendirmegiň soraglary» diýen tema boýunça trening geçirildi. Oňa köpçülikleýin habar beriş serişdeleriniň wekilleri, ýurdumyzyň ugurdaş ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyplary gatnaşdylar.
Abraýly halkara guramalar, ilkinji nobatda, Birleşen Milletler Guramasy, onuň ýöriteleşdirilen düzümleri bilen işjeň hyzmatdaşlygy ösdürmek Bitarap Türkmenistanyň daşary syýasat strategiýasynyň esasy ugurlarynyň biridir. Şunuň bilen baglylykda, Türkmenistan bilen ÝUNISEF-iň arasyndaky gatnaşyklar yzygiderli we ýokary derejede ösdürilýär. Mälim bolşy ýaly, tutuş Ýer ýüzünde çagalaryň hukuklaryny ilerletmek maksady bilen, 1946-njy ýylda döredilen ÝUNISEF häzirki wagtda dünýäniň 190-dan gowrak ýurdunda çagalaryňdyr ýaş raýatlaryň goraglylygyny, sagdynlygyny we bilimliligini üpjün etmek ugrunda iş alyp barýar.
Türkmenistan bilen ÝUNISEF-iň arasyndaky hyzmatdaşlyk öz gözbaşyny 1994-nji ýyldan alyp gaýdýar. Şol ýylda bu düzüm ýurdumyzda halkara guramalaryň ilkinjileriniň hatarynda öz wekilliginiň işini ýola goýdy. BMG-niň Çaganyň hukuklary hakynda Konwensiýasy bolsa Garaşsyz döwlet hökmünde Türkmenistanyň adam hukuklary ulgamynda goşulan ilkinji resminamalarynyň biridir.
Häzirki döwürde Türkmenistan bilen Birleşen Milletler Guramasynyň Çagalar gaznasynyň arasyndaky hyzmatdaşlyk barha giňeýär. Mälim bolşy ýaly, ýurdumyz 2024 ― 2026-njy ýyllar döwri üçin BMG-niň Çagalar gaznasynyň Ýerine ýetiriji geňeşiniň agzalygyna biragyzdan saýlandy. Bu bolsa ÝUNISEF bilen uzakmöhletleýin hyzmatdaşlygyň netijeli häsiýete eýediginiň güwäsidir. Häzirki wagtda bu hyzmatdaşlyk degişli Maksatnamanyň çäklerinde alnyp barylýar. Şu gezekki geçirilen treningiň baş maksady hem çagalaryň saglygyny goramak, olaryň iýmitlenmegi, irki ösüşi, durmuş goraglylygy we ýokary hilli inklýuziw bilim almagy ýaly wezipeleri durmuşa geçirmekden, bu maksatlaryň ähmiýetini köpçülikleýin habar beriş serişdelerinde şöhlelendirmegi gazanmakdan ybaratdyr.
Täzegül AÝAZOWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallymy.