“Bitarap Watanymyzyň bagtly geljegi – ahlakly watançy ýaşlar” atly okuw sapagy
2021-nji ýylyň 28-nji dekabrynda Türkmenistanyň Daşary işler ministrliginiň Halkara gatnaşyklary institutynda “Bitarap Watanymyzyň bagtly geljegi – ahlakly watançy ýaşlar” atly göreldeli okuw sapagy geçirildi. Halkara gatnaşyklary we diplomatiýa kafedrasynyň müdiri, filosofiýa ylymlarynyň kandidaty, taryh ylymlarynyň doktory, professor, Adatdan daşary we Doly ygtyýarly Ilçi A.Rahmanowyň alyp baran sapagyna institutymyzyň talyp ýaşlary gatnaşdylar.
A.Rahmanow sapagynda talyp ýaşlara diplomatiýa, halkara gatnaşyklary, diplomatlara bildirilýän talaplar, şeýle hem Watanymyzy ösdürmekde olaryň eýeleýän wajyp orny barada giňişleýin gürrüň berdi, öz gazanan durmuş tejribelerini paýlaşdy. Ol hormatly Prezidentimiziň şu ýylyň 1-nji sentýabrynda paýtagtymyzyň Maslahatlar köşgünde ýaşlara beren öwüt-nesihatlaryna berk eýermek bilen, ýaşlaryň watançy, dogruçyl, zähmetsöýer bolup ýetişmekliginiň wajypdygyny aýratyn nygtap geçdi.
Sapagyň barşy ilçi bilen talyplaryň özara sorag-jogap alyşmalary bilen utgaşdy.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
1-nji ýyl talyby