Birleşen Milletler Guramasynyň Ösüşi utgaşdyrmak boýunça sebitleýin merkezi talyplar bilen bilelikde duşuşyk geçirdi
2022-nji ýylyň 16-njy sentýabrynda Türkmenistanyň Daşary işler ministrliginiň Halkara gatnaşyklary institutynda Birleşen Milletler Guramasynyň Ösüşi utgaşdyrmak boýunça sebitleýin merkeziniň (UNDCO) Ýewropa we Merkezi Aziýa boýunça başlygy hanym Gwi-Ýop Son, şeýle hem Birleşen Milletler Guramasynyň Türkmenistandaky hemişelik utgaşdyryjysy Dmitriý Şlapaçenko bilen biziň institutumyzyň we Halkara ynsanperwer ylymlary we ösüş uniwersitetiniň talyplarynyň gatnaşmagynda duşuşyk geçirildi.
Duşuşygyň dowamynda talyplar myhmanlara Birleşen Milletler Guramasynyň alyp barýan işleri barada özlerini gyzyklandyrýan soraglary berdiler. Şeýle hem, duşuşykda myhmanlar talyplaryň durnukly ösüş maksatnamalaryny halkara derejesinde amala aşyrmak boýunça tekliplerini diňlediler we bu ugurda ýaşlaryň pikirleriniň örän möhümligi barada belläp geçdiler.
Bitarap Türkmenistan döwletimiz BMG-niň ygtybarly hem-de jogapkärli hyzmatdaşy hökmünde netijeli hyzmatdaşlygy has-da pugtalandyrmagy we giňeltmegi ugur edinýär. Üstünlikli durmuşa geçirilýän bilelikdäki maksatnamalar, meýilnamalar hem-de milli we umumy bähbitlere kybap gelýän ugurdaş taslamalar şol köpugurly hyzmatdaşlygyň netijesidir.
Kerim BAÝMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.