Birleşen Milletler Guramasynyň döredilmeginiň 80 ýyllygy mynasybetli bäsleşik
2025-nji ýylyň 22-nji oktýabrynda Türkmenistanyň Daşary işler ministrliginiň Halkara gatnaşyklary institutynda Birleşen Milletler Guramasynyň döredilmeginiň 80 ýyllygy mynasybetli institutyň I ýyl talyplarynyň arasynda Dünýä dilleri kafedrasynyň çäginde hereket edýän “LinguaWorld” ylmy gurnagynyň gurnamagynda “Languages in Harmony” atly bäsleşik geçirildi.
Bäsleşik I ýyl talyplary tarapyndan düzülen toparlar boýunça toparbaşylaryň toparyny tanyşdyrmagy bilen başlady. Her topar alty talypdan ybarat bolup, olar Birleşen Milletler Guramasynyň resmi dilleri hökmünde kabul edilen iňlis, rus, fransuz, hytaý, ispan we arap dilleri boýunça dürli soraglara jogap berdiler.
Bäsleşigiň netijesinde Halkara gatnaşyklary fakultetiniň talyplarynyň “Young Linguists” topary ýeňiji diýlip yglan edildi. Şol sanda, Halkara žurnalistikasy fakultetiniň talyplarynyň “Future Journalists” topary II orna, Halkara hukuk fakultetiniň talyplarynyň “Peaсemaker” topary we Halkara ykdysady gatnaşyklary fakultetiniň talyplarynyň “Languages of Peace” toparlary III orna mynasyp boldular.
Bäsleşik BMG-niň resmi dilleri bolan iňlis, fransuz, hytaý, rus, ispan we arap dilleriniň aýratynlyklary barada öwrenmäge mümkinçilik berdi. Şeýle-de, daşary ýurt dilleriniň halkara gatnaşyklaryny ösdürmekde möhüm orun eýeleýändigi, dilleriň gurluş aýratynlyklary barada gyzykly sowallar talyplarda dilleri öwrenmäge bolan höwesini artdyrdy. Bäsleşigiň ahyrynda ýeňijiler ýadygärlik sowgatlar bilen sylaglandy.
Talyp AGAMURADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.