“Bilimler we talyp ýaşlar güni” mynasybetli geçirilen ilkinji okuw sapagy
Berkarar döwletimiziň täze eýýamynyň Galkynyşy döwründe hormatly Prezidentimiziň üstünlikli durmuşa geçirýän döwlet syýasaty netijesinde milli ykdysadyýetimiziň beýleki pudaklary bilen bir hatarda milli bilim ulgamynyň okuw-usuly binýady yzygiderli kämilleşdirilýär. Türkmenistanyň Prezidentiniň kabul eden Kararlary bilen tassyklanan “Türkmenistanda sanly bilim ulgamyny ösdürmegiň Konsepsiýasyny”, “Türkmenistanda daşary ýurt dillerini okatmagy kämilleşdirmegiň Konsepsiýasyny” durmuşa geçirmegiň çäklerinde okuw-terbiýeçilik işleri giň gerime eýe bolýar.
Ine, “Arkadag Serdarly bagtyýar ýaşlar” ýylynda hem ýetip gelen “Bilimler we talyp ýaşlar güni” mynasybetli täze okuw ýylynyň ilkinji okuw sapagy Türkmenistanyň Daşary işler ministrliginiň Halkara gatnaşyklary institutynda Halkara gatnaşyklary we diplomatiýa kafedrasynyň uly mugallymy, Adatdan daşary we Doly ygtyýarly Ilçi Nurberdi Amanmyradowyň alyp barmagynda ýokary derejede guramaçylykly geçirildi.
Ussat diplomat okuw sapagynyň dowamynda bu günki günde ýaşlar baradaky döwlet syýasatynyň üstünlikli durmuşa geçirilýändigini, halkara gatnaşyklarynda hem ýaşlar üçin giň mümkinçilikleriň döredilýändigini bellemek bilen, has guwandyryjy wakalaryň biri bolan Türkmenistanyň Magtymguly adyndaky Ýaşlar guramasynyň ÝUNESKO-nyň Bütindünýä Ýaşlar jemgyýetiniň resmi agzalygyna kabul edilmegi diňe bir ýaşlarda däl, eýsem, ähli türkmen halkynda uly buýsanç duýgularyny döredendigini belläp geçdi. Şeýle-de, Gahryman Arkadagymyzyň “Ömrümiň manysy” atly atalyk kitabynda beýan edişi ýaly, hünäri dogry saýlap almak meselesiniň örän zerurdygyny, her bir hünäriň ylaýta-da, diplomat bolmaklygyň ýokary jogapkärçiligi talap edýändigini, hut şonuň üçin bu hünäri saýlap alan her bir hünärmen, yhlasly, erjel we hyjuwly okap, höwesli, döredijilikli we halal zähmet çekmek bilen, mähriban Watanymyzyň belent halkara abraýyny we şöhratyny has-da ýokarlandyrmaga çalyşmalydyr diýip talyp ýaşlara gürrüň berdi.
Şeýle hem çykyşynyň ahyrynda halypa mugallym hormatly Prezidentimiziň, Gahryman Arkadagymyzyň taýsyz tagallalary netijesinde içeri we daşary syýasatda gazanylýan üstünlikler ýaş nesillerde at-abraýy dünýä dolan hemişelik Bitarap döwletimize beýik söýgini terbiýeleýär diýip belläp geçmek bilen bir hatarda, bu günki günde ýurdumyzyň baýry ýokary okuw mekdepleriniň biri bolan Türkmenistanyň Daşary işler ministrliginiň Halkara gatnaşyklary institutynyň bagtyýar talyby bolmak bagty miýesser eden talyplary ýene bir ýola tüýs ýürekden gutlady.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
II ýyl talyby.