Belgiýaly hünärmeniň gatnaşmagynda geçirilen okuw sapagy
2025-nji ýylyň 12-nji maýynda Türkmenistanyň Daşary işler ministrliginiň Halkara gatnaşyklary institutynda Belgiýanyň «Diplomatic World» institutynyň agzasy, Merkezi Aziýanyň taryhy we geografiýasy boýunça ýöriteleşen daşky gurşaw hünärmeni, bloger Derýa Soýsalyň okuw sapagy geçirilip, oňa institutyň Halkara žurnalistikasy fakultetinde bilim alýan talyp ýaşlar gatnaşdylar.
Okuw sapagynyň dowamynda belgiýaly hünärmen Türkmenistanyň döwlet Garaşsyzlygyny alaly bäri özüniň parahatçylyk söýüjilikli başlangyçlary arkaly sebit durnuklylygyny ýokarlandyrýan bitarap döwlet hökmünde tanalýandygyny ähmiýet berip nygtady. Şeýle-de Birleşen Milletler Guramasynyň Baş Assambleýasy tarapyndan Türkmenistanyň başlangyjy bilen yglan edilen Halkara parahatçylyk we ynanyşmak ýylynyň ähmiýeti dogrusynda Türkmenistanyň Belgiýadaky ilçihanasynda alnyp barylýan işler, geçirilýän giň möçberli çäreler dogrusynda buýsanç bilen belledi.
Mundan başga-da, okuw sapagynyň dowamynda belgiýaly bloger žurnalistika hünärinde bilim alýan talyplara ýerli, sebit we dünýä täzeliklerini dessin halka ýetirmekde žurnalistika käriniň ähmiýeti, sanly ulgamyň peýdaly taraplary barada özüniň tejribesi esasynda giňişleýin gürrüň berdi.
Okuw sapagyň ahyrynda talyplar özlerini gyzyklandyrýan sowallar bilen ýüzlenip, olara kanagatlanarly jogap aldylar.
Güljemile DÄDEBAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.