Baýramçylyk duşuşygy geçirildi
2021-nji ýylyň 22-nji dekabrynda Türkmenistanyň Daşary işler ministrliginiň Halkara gatnaşyklary institutynyň, S.A.Nyýazow adyndaky Türkmen oba hojalyk uniwersitetiniň, şeýle-de Türkmenistanyň Zenanlar birleşiginiň Merkezi Geňeşiniň bilelikde guramagynda «Ak öý – türkmen medeniýetiniň aýrylmaz bölegi» atly baýramçylyk duşuşygy geçirildi. Türkmenistanyň Daşary işler ministrliginiň Halkara gatnaşyklary institutynyň eýwanyndaky bezemen ak öýüň içinde Täze ýyl baýramy mynasybetli geçirilen duşuşyk täsirliligi bilen tapawutlandy. Gadymdan gelýän üme dessury boýunça geçirilen baýramçylykda ýaňlanan joşgunly aýdym-sazlar el işlerini edip oturan talyp gyzlardyr zenan mugallymlara ruhubelentlik bagyşlady. Duşuşygyň dowamynda S.A.Nyýazow adyndaky Türkmen oba hojalyk uniwersitetiniň «Altyn asyr» medeniýet merkeziniň aýdymçylar toparynyň, Türkmenistanyň Daşary işler ministrliginiň Halkara gatnaşyklary institutynyň aýdym-saz toparynyň, institutyň talyp gyzlarynyň ýerine ýetiren el işlerini wasp edýän edebi-sazly kompozisiýasy, Maýa Kulyýewa adyndaky Türkmen milli konserwatoriýasynyň uly mugallymy Begenç Moşşyýewiň, Magtymguly adyndaky milli sazly-drama teatrynyň sahna ussady Tirkeş Mätnazarowyň we beýleki aýdymçylaryň aýdymlary ýaňlandy. Zenan mugallymlar tarapyndan hormatly Prezidentimiziň 2021-nji ýylyň 1-nji sentýabrynda ýurdumyzyň ýokary okuw mekdepleriniň talyp ýaşlary we mekdep okuwçylary bilen bilelikde geçiren ilkinji umumy okuw sapagynda «Ak öý – türkmen medeniýetiniň aýrylmaz bölegi» diýip aýdan taryhy jümlesiniň many-mazmunyny has-da içgin düşündirdiler. Şeýle-de 2021-nji ýylyň dowamynda milli Liderimiziň baştutanlygynda ýurdumyzyň halkara başlangyçlarynda ýetilen sepgitler boýunça buýsançly gürrüňler edildi.
Hatyja Döwletnazarowa,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.