BAÝRAMÇYLYK BÄSLEŞIGINIŇ ÝEŇIJILERI SYLAGLANDY
2021-nji ýylyň 22-nji oktýabrynda Magtymguly adyndaky Türkmen döwlet uniwersitetinde “Garaşsyzlyk bagtymyzyň çyragy, arzuwlan zamanaň geldi, Pyragy” ady bilen aýdym-sazly dabara geçirildi. Mukaddes Garaşsyzlygymyzyň şanly 30 ýyllygyna hem-de Magtymguly Pyragynyň 300 ýyllygyna bagyşlanylyp geçirilen bu dabara uniwersitetiň professor-mugallymlary hem-de ýurdumyzyň ýokary okuw mekdepleriniň birnäçesinden talyp ýaşlar gatnaşdylar.
Joşgunly geçen dabaranyň dowamynda bu ýokary okuw mekdebiň mugallymlarynyň ençemesine Türkmenistanyň Demokratik partiýasyna agzalyk baradaky şahadatnama gowşuryldy. Şeýle-de Garaşsyzlygymyzyň 30 ýyllygyna mynasybetli Magtymguly adyndaky Türkmen döwlet uniwersiteti tarapyndan guralan “Garaşsyz, Arkadagly Diýarym” atly bäsleşiginiň jemi jemlenip, baýramçylyk bäsleşiginiň ýeňijileri sylaglandyryldy. Iki derejede geçirilen bu bäsleşikde birinji dereje boýunça ýurdumyzyň ýokary okuw mekdepleriniň žurnalistika hünäriniň talyplary, ikinji dereje boýunça bolsa, beýleki hünärlerdäki talyplar makala ýazmakda özara ýaryşdylar. Oňa Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyp ýaşlary hem gatnaşdylar. Bäsleşigiň netijeleri boýunça Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň III ýyl talyby Tawus Akjaýewa birinji dereje boýunça III orny eýeläp, Hormat hatyna hem-de gymmat bahaly sowgada mynasyp boldy.
Aýdym-sazly dabarada talyp ýaşlaryň Magtymguly Pyragynyň şygyrlaryndan dürli dillerde taýýarlan kompozisiýa çykyşlary we çeper okaýyşlary tomaşaçylar üçin örän täsirli boldy.
Dabaranyň ahyrynda “Arkadaga şöhrat!”sözleri oňa gatnaşyjylar tarapyndan belentden ýaňlandy.
Gülnar AKYLLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.
Türkmenistanly talyplaryň arasynda makala ýazmak boýunça yglan edilen bäsleşigiň ýeňijileri yglan edildi | Bilim (turkmenportal.com)